智取大市：突破裂口之險象
■港股上周五以超大成交呈現突破性向下裂口，技術上差到不得。 資料圖片
上星期五港股跌勢加劇，唔少今年強勢股單日跌半成至一成，但跌勢頗有秩序，低開後慢慢跌、慢慢派，並非恐慌性急插嘅情況。有別於7月4日，騰訊（700）《王者榮耀》被官媒狙擊，拖累港股一度跌500
點，當日下晝開市即出現恐慌性拋售，掟到甩肺之後，市場回復冷靜，唔夠幾日又重拾升勢。咁今次又會點？
恒指上星期五以超大成交呈現突破性向下裂口，技術上係差到不得了嘅形態，依書直說係跌市只係開始，嚟緊會有持續性裂口同消耗性裂口出現，之後先見底。
其實由2008年金融海嘯至今，都有唔少大成交突破性向下裂口嘅大跌往績，個別非股災市況之中，的確有fake到裂口急跌當日等同見底，然後快速回升。不過，今次徵狀唔係咁好，突破性向下裂口並無伴隨即市恐慌性拋售呢種見底徵兆出現，即係話，好友仍然偏冷靜，派發亦有秩序，唔似係慣常嘅跌市終結模式，可見今次強烈利淡形態有效嘅機會比較高。
過往大成交突破性向下裂口出現之後，未必會即時繼續跌，都可能有兩日反彈，然後急轉直下，因此周初回穩嘅話，咪輕易被fake到，不容掉以輕心。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
