中環在線：
陳德霖唱一曲籌廿萬
■陳德霖（中）同湯文亮（右）一齊唱歌籌款。
大家平日見到嘅金管局總裁陳德霖一句起兩句止，說話四平八穩，好似唧都唔識笑，查實佢份人好有幽默感，當佢興之所至講一兩個笑話，真係笑到人流眼水，佢得閒仲會搞嚇爛gag㖭，好似上星期五佢出席「培苗行動」籌款晚宴，
佢上台唱3首歌幫手籌款，開金口前先來個爛gag。
培苗行動主要資助內地幾個貧困地區嘅學生讀書，每年幾千蚊就可以資助一個學生讀書，上周五籌款晚宴算係星光熠熠，有恒隆地產（101）集團傳訊及投資者關係董事關則輝、「開心果股評人」藺常念、紀惠行政總裁湯文亮同埋陳德霖等等。
自嘲唱歌難聽但有價值
據聞，陳德霖上台唱歌前，先講笑話，佢話歌分兩種，好聽嘅就大家可以好好欣賞，另一種難聽嘅，好似佢唱嗰種，都有價值，就係可以籌款嘞。呢晚佢一共唱咗3首歌，其中一首係關正傑嘅《天籟》，淨係呢首都籌得20萬元，認真唔講得笑。據現場探子回報，陳總嘅歌喉係不俗嘅。
關則輝自2009年開始支持培苗行動，佢話，每年籌款晚宴都見到陳德霖，估計陳總已經支持培苗一段長時間，不過關則輝之前北上去貧困地區探學生，就未試過同陳總同團，佢多數同自己港大舊同學一齊去，69歲嘅藺常念就話，希望今年底可以跟埋關則輝北上探學生。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
