跌市之劫仲未應
2017年08月14日
美國總統特朗普同北韓總統金正恩大打口水戰，平壤話隨時向關島射導彈，白宮話有膽你就嚟，港股借啲意就插咗近千點，穿番兩萬七關口，上周五單日就跌咗560點，成交逾1393億元。以全周計，恒指累積下跌679點；國指累積下滑430點。杜指收市報21858
點，升14點。納斯達克指數收市報6256點，升39點。標普500指數收市報2441點，升3點。
美朝鬥嘴，外界o依家其實都仲係預期唔會出事，否則個市又點止跌咁多。傳統上「炮聲一響、黃金萬両」，打仗唔一定對股市不利，好似上世紀九十年代美國入侵伊拉克，火箭一射美股就爆咗上去，但而家平壤聲稱有核彈頭，有可能話會發生核戰，咁情況就真係好唔同，而家個市反應平靜，係大家都覺得講還講，相信兩邊都唔會先打響第一槍。
調整仍算正常範圍
港股上星期連插三日，咁啱陸羽仁同猛人食飯，講起十年一刧唔係咁易避，有茶友問而家個市咁插法，算唔算係應咗劫先？如果以上個星期大市嘅跌幅嚟講，大致都仲係正常嘅調整，雖然大市插成千點跌勢好急，計幅度都只係幾個巴仙，如果真係講應劫嘅話，應該仲要跌得多啲。由於而家佢都仲係正常調整範圍，仍然只係以平常心對待，如果有好多錢就撈吓貨無所謂，否則都唔使太心急郁手。
騰訊再被照肺
睇番個市喺回調前，主力靠隻騰訊帶動，周五佢被人狂插，理由係中國國家網信辦表示已就涉嫌違反《網絡安全法》對騰訊微信等平台立案調查，消息令股王騰訊受壓，股價單日大插5%，報收310.6元，市值回落至2.95萬億元，一隻股成交就超過181億元，為跌幅最大藍籌股，拖低恒指153點。騰訊呢排不時傳出同監管有關嘅負面消息，包括早前被官媒點名佢嘅手遊令青年人沉溺，呢次再傳出平台被查，騰訊微信團隊證實收到國家網信辦的通知公告，強調會對平台進行嚴格自查自糾，也會積極配合廣東省網信辦調查。公司話，一直以來，暴力恐怖、虛假謠言、淫穢色情等網絡不良訊息屢禁不止、嚴重敗壞社會風氣，微信團隊和社會各界一樣都對此深惡痛絕。微信團隊在技術和規則等方面，採取了一系列策略措施應對上述行為，一經發現，堅決打擊。同時強調對於給用戶帶來的困擾，深表歉意。對於政府近日嘅批評，騰訊嘅應對都係即時認衰，在商言商，對做生意嘅人嚟講，面子絕對唔係問題，亦都唔係成本，只不過咁做唔知係咪可以過骨，令人擔心科網股嘅政治風險增加。
內地國策係高新科技全速發展，成功打造咗幾間國際級嘅網企，但呢啲網企嘅發展似乎引起咗政府部門嘅憂慮。除咗騰訊外，近日網企推動無現金交易，都惹來金融部門關注，有內地報道指，人民銀行近日對各分支行下發通知，要求糾正和引導螞蟻金服無現金活動，人行武漢分行約談螞蟻金服相關負責人，明確提出刪掉「無現金」宣傳字眼等三點要求，若然類似嘅監管訊息持續出現，對內地科網股都會成為另類陰影。
之前騰訊升得咁勁好大動力來自大行唱好，大行嘅取態主要係受美國科網股迭創新高影響。係大行推波助瀾下，騰訊不斷破關，出現十連升後市值衝破三萬億元，市盈率超過65倍。
中美科網股鬥貴
科網狂潮創造咗幾隻超級巨無霸股份，好似美國阿馬遜市值去到5000億美元，迫近四萬億港元關口，同樣係美國科網股龍頭嘅臉書市值差唔多，雄霸內地市場嘅騰訊就有三萬億元。三萬億市值嘅公司應該要賺幾錢至合理呢？如果以成熟公司計，估值係10倍至15倍，咁即係話要賺2000至3000億元一年，等如佢舊年盈利嘅5至8倍。
o依家中移動市值係一萬七千億元，去年賺1087億元人民幣，未來騰訊賺嘅錢要多過中移動1倍至2倍，就值而家嘅價錢。有人話，臉書只係有社媒嘅功能，但騰訊有WECHAT之外，仲有手遊功能，仲有支付功能，幾件資產樣樣都好值錢，所以計落唔算貴。如果貨比貨，騰訊可能係抵買過美國嘅科網股，但呢樣嘢可能係代表美國嘅科網股估值更高，從大市成幅圖畫嚟睇，美股基本上高過港股，至於咁係咪仲可以追入，或者佢仲係咪可以再推動市向上，投資者可以自行判斷啦。
岳少60大壽宴客 擺足兩日有因由
旅發局主席林建岳上個星期六十大壽，佢識飲識食兼玩得，自然唔會錯過機會，一連兩日係中環建銀大廈嘅好酒好蔡搞咗壽宴，聽講搵咗佢名下唔少名廚獻藝，令一眾捧場嘅名人大飽口福。有人奇怪，點解壽宴要擺兩日，就算想搞隆重啲，照計由朝食到晚都夠啦。據講原因之一，係場地雖然已經唔細，但由於岳少老友太多，一日實在請唔晒，於是擺夠兩日。有中環茶友話，如果要請得人多，當然可以係會展擺番一百幾十圍，但咁樣啲嘢好難整得好食，以佢咁嘴尖，當然不能接受，分兩日請客，似乎係最佳辦法。
岳少呢排唔知係咪人紅是非多，早排旅發局搞咗個電競節，本來活動搞得好好哋，傳媒評價都好OK，但突然之間有人走出嚟，質疑活動投標程序唔公平。本來有不滿可以投訴，但佢就出來炮轟之餘，燒到岳少身上，結果被岳少告佢誹謗。中環茶友話，近年社會風氣好興鬧吓人，不過，你鬧招標程序有問題，又質疑公職人員嘅做法，呢啲嘢可大可小，岳少無得唔執正嚟做，一係當事人就澄清；一係就對簿公堂，岳少打得官司，當然係落足料，加上佢係名人，勝負涉及嘅律師隨時好大上落。聽聞今次涉及嘅人都有家底，不過如果只係為啖氣，最後都係益咗律師啫。
陸羽仁
陸羽仁周記 - 陸羽仁 舊文
來源 source: http://hdfin.stheadline.com
