金手指：各層水喉齊齊收水
■美股好多指標已超越以前啲泡沫頂，聰明錢開始部署買跌。 資料圖片
資產價格齊升跌，有如佛利民話齋，永遠同喺邊都係究竟有冇錢喺到射住。而水嘅嘢，可因水喉大，水源足；亦可因現有嘅水庫雖小，都因循環速度快，而令水壓大，射啲嘢上。
問題係，真係種種跡象顯示，全球市場
將會因收水令資產價格下跌。先講宏觀，大陸嘅信貸衝力credit impulse已經下滑數月。而因大量資產嘅價格，歷年來都有滯後關係，所以時間上脗合股市現壓力。
再講，聯儲局九月一定縮表。因以前未試過，所以啲人唔覺會點。不過，所以聰明錢眼見美股升，有好多指標已超以前啲泡沫頂，就開始部署買跌，甚至買大跌，更有買短期內發生。多唔好講，多輪量化寬鬆，每次都帶來升市嘅快感。當九月宣佈量化收縮，淨係從邏輯角度，應該會帶來快感嘅相反。
而啲金融機構，例如上周講過嘅Interactive Brokers，同埋周末宣佈嘅Saxo Bank，都話會大幅提高嗰啲買恐慌指數VIX跌衍生工具嘅孖展按金，變相令少咗啲錢壓低恐慌指數，而當啲買賣電腦見少咗錢撳低VIX，就會拋貨減持正股。即之前牛市嘅循環，變成惡性。
特朗普會唔會同金仔互揼？我唔知，不過當佢哋唔互揼都會因各層水喉齊收水而令股市跌，呢個唔係我會再賭嘅市。大家執生。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
