「加槓桿股」要避一避
2017年08月15日
港股反彈1.4%比美股更有力，算係初步企穩。未來局勢要睇美朝兩國會將緊張關係升溫抑或降級，如果兩國唞一唞後繼續「晒冷」，咁股市彈完唔排除再插，畢竟大市累積升幅唔嘢少。不過政治市好多時懸於當事人一念之差，好難預測，過去經驗係任何消息，第一次
爆發威力最大，跟住市場就逐步習慣。
大市經歷北韓危機第一波衝擊，昨日反彈資金流入科技股同有特別消息嘅股份，當中最特別係萬達酒店(169) ，佢宣佈資產置換後股價爆升45，收2.2元。我話佢「特別」，唔係因為佢重組酒店物業資產呢單嘢，而係佢老闆王健林早前搞大動作，將旗艦萬達商業嘅資產同融創(1918) 置換，喺內地接連受官媒炮轟，但佢哋好似橫練不死身，股價鬧極唔跌，都算特別啦。
內地官媒《人民日報》噚日發表署名文章，題為「莫把工具當目的」，插萬達、融創、富力地產嘅資產置換計劃，話嘅係萬達「高調甩賣」策略。文章話鋒一轉，連工、建、農、中、建四大國有銀行都插埋，話佢哋「繼續碾壓國際同行，頗有高處不勝寒嘅感覺。該為如此賺錢的中國金融業高興嗎？看着仍在陣痛期爬坡過坎的中國製造業，金融業不妨多想想『皮之不存，毛將焉附』的警句。」
文章批評各種不負責任嘅操作，用「轉槓桿、加槓桿」去達成目標，強調金融體系要消除風險，就要去槓桿，過程中要防止有人「轉槓桿」甚至「加槓桿」，進行金融嘅供給側改革，令體系能脫實向虛。
官媒呢篇評論其實都幾辣，講得白啲係話有企業借得大、博得大，銀行推波助瀾，搞出泡沫。喺這種氛圍下，唔止點名嘅萬達系旗下萬達酒店大升，融創噚日都無受不利消息影響，彈升3，收18.9元。但佢哋神勇嘅表現，有可能係外界暫時仲未識驚，因為照呢個講法，監管機構無理由唔做嘢啩。
波鞋股裕元(551) 中期突然有動作，宣派高息。佢公佈上半年業績錄得純利2.59億美元，增長4%，每股盈利15.71美仙，中期息維持40港仙，同時仲大派特別息3.5港元。裕元係老牌工業股，表現長期都幾穩定，但過往好少派特別息，而且今次仲係中期，董事會忽然派發幾十億元股息，認真大手筆，消息即時令到股價係亂市中突圍，升5%。睇番呢次公佈勁派息合共超過60億元，最大受益者係持有公司超過一半股權嘅大股東。
點解裕元喺中期就急急派息，而且睇番公司嘅現金狀況，派60億元都算係極高比例，有啲意想唔到，小股東感覺特別正。呢種情況好多時令人聯想到大股東想攞啲錢使，相信未來重現機會唔係幾大。以裕元盈利能力嚟講，應該有力負擔呢次派息，由於工業股唔係咁計資產，公司派咗大筆現金，對佢影響唔大，所以雖然派息唔可以提高佢嘅整體估值，但收咗股息都唔會影響市場俾佢嘅評價，如果將來股價維持，咁股東收咗嘅息就係「淨袋」，都可以話係個小驚喜。
另一隻有特別情況值得大家留意嘅股份，就係新世界中國(825) ，大股東早前提出以每股2元私有化，建議今日截止。由於之前佢曾經升破私有化價錢，外界擔心佢私有化可能失敗。過去呢系公司曾有私有化泡湯例子，有人話若然私有化失敗，股價短期有可能下插，所以最好趁股價接近私有化價錢就沽貨，呢個建議係太子都食唔壞嘅穩陣處方，若然私有化成功，沽咗貨者雖然收少咗，但唔使等咁耐套現，回籠資金可以走多轉，若然私有化失敗股價插低，咁就可以搵機會翻兜，博佢日後再嚟一次，咁樣賺少啲「袋住先」等博大霧嘅游擊策略，最適合話唔到事、又唔係大戶嘅老散。
陸羽仁
金融High Tea 舊文
來源 source: http://hdfin.stheadline.com
