中環在線：
銀娛突取消業績會 呂志和避風頭？
■呂志和取消銀娛業績會，或者想避一避風頭。
澳門上周飽受颶風天鴿摧殘，呂志和旗下銀娛（027）亦爆出關公災難，被指刻薄員工，又冇即時幫手救災，因而遭到猛烈抨擊，去到周日先至話捐錢6,000萬（澳門元，下同）。銀娛今日公佈業績，原本有業績
會，噚日忽然話取消，公關解釋，公司希望集中精神處理災後事宜，孖屐就懷疑呂志和想避一避風頭囉。
天鴿橫掃澳門後翌日，銀娛即被工會炮轟，要員工颱風過後兩個鐘內返工，否則扣錢；又叫員工一齊清理酒店泳池，未即時組織義工隊救災。澳門銀河facebook成為炮灰，網民大鬧公司「自私」、「發錢寒」。銀娛為免事件發酵，隨即澄清泳池確實受災嚴重，恐水渠堵塞而決定先行清理，惟用詞不當而「跪低」道歉。
加津貼挽救關公災難
聽聞，銀娛為呢件事檢討後，已經發出內部員工信，訂定新颱風政策，指是次管理層「確實上了寶貴的一課」，面對颱風來襲，即時未有全面應對準備。新政策下，8號風球前線員工嘅工作津貼由200元增至500元，10號風球增至1,200元；未能準時返工會作彈性處理，可酌情放有薪假，OT仲可獲1.5倍時薪。對冒住風雨返工嘅員工叫做有啲交代咁。
銀娛高層應該點都估唔到一場颶風會變成關公災難，業績好唔好都唔想咁高調講住喇，反正大家目前嘅關注點，都唔係業績。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
