Money Walker：財經專欄的意義
■專家推介只宜視作補充資料，散戶需自己發展出一套交易模式。 資料圖片
有人講過"Information is cheap, but meaning is expensive"，意指獲取資訊嘅成本好平，但資訊所帶來嘅意義卻好寶
貴。自從有咗手機流動上網，免費資訊已唾手可得，掌握財經資訊亦好容易，問題係啲資訊有冇意義，講緊嘅意義當然係幫唔幫到你搵錢。
今時今日，股民單憑手機app推送通知已得知天下財經焦點，要自行分析投資市場自然較以前容易得多，人人都可以係專家，要有insight唔一定要再睇財經專欄，加上財經分析良莠不齊，搞到讀者紛紛叫專家食屎。
為咗從廉價資訊中過濾出有意義資訊，即係幫到自己搵錢嘅「飛」，有人發明出追蹤財經專欄推股準確度嘅app，各大專家有幾明燈一眼睇曬。又有散戶寧願畀少少錢買數據或趨勢分析平台作為輔助工具，化身數據人自己做專家。當然亦有部份散戶覺得單憑自己直覺落注完全零分析，亦好過聽所謂專家之言。
筆者就覺得專家推介有參考價值，始終唔同人有唔同揀股套路，別人總有機會留意到你未必留意到嘅嘢，但一切只宜視作補充資料，散戶亦需自己發展出一套交易模式。事關撇除專家本身有冇料、所推介股份係咪有利益衝突呢啲不談，財經專欄本身有其局限性。
財經專欄只能提供看好股份同出入市價位參考，但適當嘅出入市價位其實會隨市況隨時變化，散戶要自行應變唔能夠一味死跟，而且注碼控制同資產配置一樣會影響到整體投資組合表現，但呢兩方面同樣需要散戶自己判斷，唔係財經專欄講到畀你知。
El.
Money Walker - El. 舊文
來源 source: http://hk.apple.nextmedia.com
