恒大又開餐
2017年08月30日
恒指兩萬八千關受壓，破關不成自然要向下再調。既然市場人士認為大市升得慢好過升得急，北韓再射導彈，港股借勢唞唞，調整算係順天應人。
調整市中，內房巨股恒大股價照創新高。恒大(3333) 公佈中期業績，股東應佔利潤188.3億元人民幣，按年上升8
.3倍，每股盈利1.4元，唔派息；核心利潤就按年升近2.5倍至273億元。
今年內地樓市喺中央加強調控下，仍然保持相當熱度，內房企業紛紛上調全年銷售目標，但恒大高管表明唔調整今年銷售目標，未來唔再追求銷售量第一，要爭取毛利率同淨利潤達到第一，仲表明有信心超額完成全年銷售目標4500億元。
棄做一哥股價反升
過去恒大急速「發大」，成為市場人士看淡集團嘅理據，但自去年集團安排回歸A股，就開始改變策略，致力減低負債之餘，仲要推高利潤率，呢個做法等如霸咗好大塊地，依家開始慢慢食吓種出嚟嘅好嘢，友好大戶亦埋枱開餐，好似華人置業(127) 就披露，由今年4月至今，喺公開市場購入中國恒大(3333) 約7.66億股，相當於已發行股本約5.83%。
沽空恒大嘅投資者本來想趁佢轉集資之餘施以狙擊，咁啱公司改行保守策略，公佈出嚟嘅盈利數據質素有改善，對淡友就變成「壞消息」。恒大(3333) 收市大漲11.84%，報25.5元；帶動其他內房造好，中國上城(2330) 乾升8%，報0.232元；合景泰富(1813) 升7%，報6.3元；萬達酒店發展(169) 升6%，報1.68元。
有熟悉恒大嘅人士話，舊年恒大狂谷銷售數字，成為全國賣房一哥，外界估計佢會想爭取兩年冠，但依家睇碧桂園(2007) 嘅賣樓已有領先跡象，恒大亦表明唔會夾硬谷。今年公司唔再睇一哥個位睇得咁重，同佢哋回A有關係。
如果有留意集團為咗返內地上市，曾經引入策略投資者。喺引入呢啲大戶之時，佢哋對公司未來營運策略會達成默契，以便公司能夠順利分拆，所以公司出嚟嘅數字靚咗唔係偶然，而係成個融資安排要達至嘅結果。公司變咗招，點拆就要考淡友嘅功夫啦。
金股相對仍落後
北韓射導彈，恒指應聲最多跌224點，於27600見支持，午後跌幅收窄，全日跌98點，國企指數收報11296，下滑45點，成交金額948億元。藍籌昨日普遍偏軟，騰訊(700) 、滙控(005) 及友邦(1299) 成為跌市元兇，騰訊跌穿320元，跌1%，報收319.8元；滙控跌0.7%，報74.8元；友邦跌0.9%，報59.25元；三股合共拖低恒指71點。
美元呢排弱勢，金價衝破1300美元盎司後再上，金股昨日略有升幅，招金(1818) 升2.11%，報6.77元；紫金(2899) 升3.15%，報2.95元；中國白銀(815) 更升5%，報1.67元。睇番金價敏感嘅招金(1818) 同江銅(358) 股價同一年高位比仲有距離，有啲落後感，主要係佢哋喺金價麻麻吓，市盈率同息率唔吸引。不過金股上落大過黃金，可視為有槓桿嘅黃金產品，鍾意炒金嘅投資者，都可以留意吓佢哋走勢。
陸羽仁
金融High Tea 舊文
來源 source: http://hdfin.stheadline.com
