【實力取勝】肥婆又玩嘢不是我寫的（陳承龍）（第143期）
2017-9-21 17:30:49
9月19日，小弟繼續忙於炒股，但發生咗一段小插曲。小弟手機收到一篇題為「肥婆又玩嘢。留給囝囝 – 胡孟青 2017年9月19日 」嘅專欄文章，內文提到有老行尊話有個股壇中
人「正欠他寶號的股票孖展融資。」暗示呢個人吹水，文章作者就話呢個人，係「自誇食得招積、住得舒適、超跑遊艇代步、模成群。」小弟因為尊重青姐胡孟青係前輩，咁作為後輩兼記者出身，親自去求證都合情合理，光明正大。點知呢，冇幾耐小弟就收到朋友whatsapp傳嚟嘅cap圖，正正係青姐cap返我問佢嘢嘅畫面。既然青姐覺得我喺私人渠道問佢嘅嘢可以公開，小弟旋即係facebook fanpage打咗以下呢封「公開信」。
給青姐的信：
青姐，我是對號入座，我本身無意再在你的文章上作無謂討論，但基於你漠視我對你的信任和尊重，將我與你的私信公開予他人，所以我也不客氣公開在此回應，反正你都會周圍傳我口訊給別人看。
無錯，我覺得你的文章是影射我，但有失實之嫌，所以我以朋友身分向你請教，而你的回應是證券行老闆沒有開名，咁即是你靠估而已，咁對所有業內人士更不公平。事實上，青姐你也作為傳媒人，更應知道，說出每件事也要有根有據，如果你真是想寫我，無問題，每天我也在新城，你可兜口兜面問過清楚，難道連問一句都嫌麻煩？
講真，你點寫我也沒所謂，反正我一向在行內聲名狼籍，不過我最失望是你漠視我對你的尊重和信任。
陳承龍
每個人心中都有把呎，尊重值幾多錢？信任值幾多錢？小弟心入面，係無價㗎咯，青姐點睇我就真係唔知啦，反正whatsapp問佢都未必答。青姐，我陳承龍都臭咗朵，被人點講冇所謂，但你喺電台電視台報章雜誌做咗咁多年財經評論，咁多人參考你嘅意見，我都曾經係你fans，究竟你近年做乜啫？你日日喺電台見到我，唔兜口兜面問我，係怕醜定唔好意思問？仲有呀，如果你睇到呢度，我作為後輩教精你呀，我炒股20年，日日都爭人孖展㗎，點解？因為入1蚊炒3蚊貨，依家入1000萬錢炒3000萬貨，炒出炒入都好受經紀歡迎，傭金人哋賺多啲，小弟又享受大啲槓桿，有乜唔妥先？青姐你唔問清楚就寫，唔好唔記得你係傳媒，寫嘢講嘢要求證㗎，你唔理我感受唔緊要，小弟閒人一個，你有冇諗過你聽眾觀眾同讀者嘅感受？
實力取勝 - 陳承龍 舊文
來源 source: http://www.winmoney.hk
