今年十一「濠」得起
2017年09月22日
聯儲局議息維持利率不變，同時由下個月開始縮減資產負債表。市場對消息反應溫和，美股稍升42點，收報22412點，再創歷史新高。港股反應唔係咁大，恒指收報28110，跌17點；國企指數收報11198，漲24點，成交金額1085億元。
聯儲局
採取拾級而上嘅縮表安排，由10月開始，每月將縮減100億美元，之後每季加多100億至每月500億美元。市場估計，聯儲局會將資產負債表規模，由現時嘅4.5萬億美元，降至大約2.5萬億美元。喺聯儲局未量寬之前，資產負債表規模約為8000多億美元，經過多年配合經濟增長，規模理應擴大，但以美國過去嘅增長同通脹計，增長一倍即係1.7萬億都已經好夠，喺家耶倫將目標訂為2.5萬億，其實仲係好寬鬆。
耶倫喺會後記者會話，除非出現好大嘅經濟逆轉，否則縮表係唔會隨便叫停。中環茶友就掉轉嚟聽，呢句話顯示若然有乜閃失，佢就會叫停，可以話係「勒住蘿柚吊頸」，好怕死。
佳兆業發揮「甘比效應」
耶倫本身係鴿派，加上美國嘅通脹預期仲係比較弱，之前預期今年會有1.7%，o依家下調至1.5%；明年就由2%下調至1.9%，喺通脹唔係咁勁，總統特朗普又注重增長同就業多過管控金融風險，佢自然唔使去得咁硬。
臨近十一國慶長假，資金都開始炒吓濠賭股，早前颱風天鴿吹到澳門翻天，搞到話連選舉都受影響，銀娛(027) 喺災後清理酒店，畀人話佢顧住發財做生意，老闆呂志和好疏爽咁捐左六千萬出嚟賑災，同時管理層決定提早分發花紅。銀娛分花紅聽講有兩部份，一部份係三年前人手唔夠開出嚟嘅期票，留喺到嘅員工每年都按約定發花紅，另外聽講今年仲有按業績同表現發嘅花紅。雖然銀娛派錢畀員工有啲以和為貴、息事寧人嘅味道，但如果公司生意唔好，賺唔到錢，管理層邊度有得手鬆，所以陸羽仁當時都話呢個消息有啟示，濠賭股之後表現都唔錯，噚日佢地又升多浸，睇嚟今年「十一效應」有得炒吓喎。
中金帶動中資金融股
金融股呢幾日有炒落後跡象，陸羽仁早前講過嘅中金(3908) ，借住騰訊入股消息，急升18%，收報18.32元。中資券商股跟炒，中國光大(165) 收19.46元，升3.7%；華泰證券(6886) 收18.6元，升3.8%；中信證券(6030) 收18.44元，升2.7%。
根據已公佈嘅安排，騰訊將會認購中金2.07億股H股新股，佔擴大後總股本4.95%，成為中金第三大股東。每股作價13.8元，涉資28.5億元。發行新H股所得款項將用喺中金補充資本，兩間公司同時訂立戰略合作框架協議，成立由雙方高級管理人員擔任聯席主席嘅戰略合作委員會，主要圍繞金融服務領域方面發展，包括精準營銷同埋大數據分析等。
中金公佈仲話，今次合作係騰訊生態圈建設嘅重要環節，對中金財富管理同資產管理業務都有重大推動作用。o依家金融科技係投資市場潮語，但中金主要從事傳統嘅金融生意，包括投資銀行業務、股票業務、固定收益業務、財富管理業務、投資管理業務同埋其他業務活動，騰訊點解要揀佢入股，同埋入左股會有合作，坦白講暫時仲係諗唔通，不過中金本身估值唔貴，未升之前市盈率唔夠20倍，所以大家未睇到有乜真正概念，股價都已經爆上。
陸羽仁
金融High Tea 舊文
來源 source: http://hdfin.stheadline.com
