美股也炒板塊輪動
2017/09/22 08:51:19
網誌分類: 經濟
美國總統特朗普簽行政命令中斷朝鮮收入，金正恩稱其「瘋子」話要報復，金價略彈收1291美元，仍在1300美元樓下潛水。
美國市場較注意的是谷歌11億美元收購台灣HTC部分智慧手機資產。而標普將中國評級從AA-下調至A
+，展望調至穩定，對中國概念股亦有影響。美股收跌，杜指結束連續7天升市、標普500指數結束連續4天創紀錄新高，杜指收市微跌53點，收報22359點。標普500指數跌8點，跌幅0.3%，仍收在2500點以上。
唔知大家覺唔覺，港股在高位橫行，波動不算太大，其實美股也是如此。標普500指數過去兩星期好多日子都只是在4、5點波幅中走動(昨日已算多)，只是正常波幅的三分一，炒指數波動的投資者話表現係一年半以來最差。波動少、成交低通常睇淡一啲，但有43年經驗的美股資深觀察家Laszlo Biryinyi唔係咁睇，佢認為美股狀況可以，真正行情在個別股票中，而板塊輪動令市場其實非常剌激，唔係表面睇咁悶。
Laszlo Biryinyi話無一個定律話要高波動和高成交股市先至會升，你只看指數，看不到市場發生什麼事。過一個月，標普500指數只升了3.2%，但生化和能源股大升，生化股升了9.5%，能源股升了8.3%，其他如半導體股升7%，零售升6.5%，材料升6.1%，銀行升4.5%。領先的板塊升得多過大市好多。
Biryinyi話這種炒不同板塊的市要選股，好似高盛，過去兩星期升了7%。但散戶的問題是過去7年炒開大市，買開指數ETFS，過去好成功，所以唔太識選股。佢話唔識選股的散戶若怕揀股，可以買標普500指數最大市值的9隻股，除咗公用和電訊股唔好買。今年以來這些標普前列股份升了25%。他認為美股第4季仍會更高。
港股都開始有美股的現象，大市不升太多，但板塊輪住炒，早一浸炒本地地產股，呢一浸又炒番內房，有人話下一浸可能炒落後的券商股。板塊輪動的特點是快來快去，炒一兩個星期又完成一轉炒作，同一個板塊可能要等回吐一下才再炒，你睇內房就睇到呢種規律。
陸羽仁
回應總數
陸羽仁 BLOG 舊文
來源 source: http://blogcity.me
