【大茶飯】識跟一定跟企鵝（青冰）
騰訊(0700)上周又有入股行動，今次係內地證券股中金(3908)，佢地本身在香港搞嘅富途證券，一世免傭的確好好綽頭，但中金就係另一個層次喇，目標唔係散戶，而係做刁、配股、IPO及資產管理。回顧番騰訊近年較大型的入股，有手遊的Supercell及電動車的T
esla，前者在去年買入，今年就大炒手遊，後者上半年先入股，近日又陸續聽到歐洲及中國，落實在2030年前要汽車全面電動化，所以今次入股，真的要好好跟進一下。
內地證券股在今年的表現的確好一般，除咗中金有騰訊刺激，累升66%，同是大阿哥的中信證券(6030)，只係升咗15%，有條件追下落後。
滬深兩市的融資融劵額上周三曾高見9900億人仔，係20個月高位，當然比起2015大時代的2.2萬億，仲有好大距離，但留意番上證指數企在3300點樓上已有一段長時間，似乎係消化緊早前的蟹貨，就係去年初的溶斷急挫區，而睇番中信證券，又真係同上證一樣，溶斷區暫時受阻。
A股下年加入MSCI，外地機構投資者要投資及關注，在未來半年肯定是有增無減的，咁要做大基金的生意，肯定係搵一線證券行吧，中金及中信證券，相信必然受惠。
內地的國企及金融改革，在十九大過後會繼續提速，神華(1088)搞合拼，中建材(3323)要收購，似乎只係先頭部隊，聯通(0762)啟動混改，亦起咗示範作用。呢兩種改革，都會涉及財務顧問和配股，單刁愈大，收嘅錢亦自然愈多，同樣地，做大刁，唔搵一線證券行搵邊個呢。
如果戰友覺得以上言之成理，那騰訊入股就更顯得有先見之明，嫌中金升得多，可以趁中信證券受阻蟹貨區時收集，到真係破咗溶斷區再加注，唔信青冰都要俾面QQ吖。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
