金融High Tea 2017年9月25日
慢牛市續炒 板塊輪動
2017年09月25日
國際評級機構標準普爾先後調低中國同香港評級，港股上周五受壓，跌229點收27880點。港股過去一個月喺27500點同28200點間波動，表面上係等候聯儲局縮表嘅消息，其實縮表措施早喺市場預期之內，聯儲局宣佈縮表之後，大市冇劇烈波動，升升跌跌，波幅減少。
唔止港股係咁，美股都係一樣，波幅收窄，成交減少。過去兩星期標普500指數大多數日子，波幅都低過5點或0.2%，意味住炒大市、玩ETF嘅投資者無肉食，美股個別板塊仍然炒得好開心。過去一個月標普500指數升咗3.2%，大炒嘅生化股及能源股分別勁升9.5%和8.3%。
大市唔升 個股喪炒
港股都有咁嘅狀況，早前熱炒嘅本地地產股，近排有回潮跡象，例如新地(016) 已經連跌七日，累積跌幅4.7%，上周五收報130.4元，當日跌1.1%，新地已經跌穿20天線(131元)水平，向住50天線嘅126元低位進發。按新地過去走勢，每年都會有幾浪深度回調到100天水平(現時約122元)，所以唔排除新地會再跌得深啲。
另外，收租股太古(019) 都連跌四日，累跌4.6%，收報76.75元，回落嘅勢頭比新地仲急。恒基(012) 相對硬淨，上周五跌0.9%，收報54.35元，連20天線，即52.1元都未到。不過如果成個本地地產股板塊仲要繼續回落，恒基可能仲要再試低位。
目前嘅板塊輪動炒作，資金唔停喺不同板塊上面轉，某個板塊炒熱咗就走人，轉到另一個板塊。近排就炒汽車股同內房股，汽車股升得比較多嘅係吉利(175) ，吉利喺本月初突破咗19.5元嘅橫行位後，出現一浪抽升，曾高見24.2元，喺短短兩星期大升24%！
上周五汽車股回吐，吉利跌3.5%，收報23.35元，其他汽車股如華晨中國(1114) 跌得仲多，上周五跌5%，收報22.6元；廣汽(2238) 跌2.3%，收報18.62元。汽車股之前升得咁急，唞唞氣都好正常。
金九銀十 偏遇調控
內房板塊上周五都下挫，恆大(3333) 跌近3%，收29.5元，終於結束九連升，恆大浪接浪升上嚟，升得相當急，上穿30元，見過高位30.4元，以其往績，回吐時亦都回得深，有機會回調到20天線，即25元水平，所以，喺恆大回落時追貨就要小心。另外碧桂園(2007) 跌2.5%，收報13.58元，碧桂園呢一浪抽升，見過15.06元，升得快亦回得比較急；佳兆業(1638) 獲劉鑾雄家族同華置(127) 購入公司發行嘅美元債券，股份連續兩日炒上，上周五逆市升5.7%，收報6.66元。九月炒內房好正常，因為內地賣樓有所謂「金九銀十」嘅講法，即九月、十月都係賣樓傳統旺季。
不過今年係咪一樣旺場就不得而知，因為中央正大力出招控制樓市。上周五晚，重慶、南昌、西安、南寧、長沙同貴陽，同時下達調控樓市措施，主要係限售限購嘅新政策。
中央對樓市嘅調控力度由十五個熱點城市，逐步向下到更多嘅熱點二、三線城市。自三月份開始實施限價、限購、限貸限賣等調控措施之後，半年內十五個熱點城市喺八月份首次出現房價全面下調，證明調控措施開始有效。
今次公佈調控嘅六個城市，唔喺呢十五個熱點城市之內，係屬於樓市嘅次熱點城市。不過近期樓價升幅喺同類城市中佔咗前列，例如南京嘅住宅樓價按月升咗0.9%，按年升8.7%；長沙就按月升0.2%，按年就大升16.9%。可見中央將調控措施擴大到呢啲次熱點城市上，係要控制樓價。現時嘅限售措施主要係針對買入第二套房或以上嘅炒樓客，並非針對買第一套房嘅用家，有助降低樓市炒作熱度。
中央對呢六個城市出台調控措施，相信會對內房股今日嘅投資氣氛有影響。理論上只要唔喺呢七個限制城市之列，照計唔會受到影響。只係管理層已顯露出要不斷調控樓市嘅政策，無論如何對內房股並非好消息。問題係呢個消息夠唔夠終結內房股呢一輪升勢，觸發一次較深嘅調整，抑或會繼續炒埋呢個「金九銀十」？
回想2015年內地大牛市嘅時候，內地炒板塊輪動活躍。內地大媽炒家每日留意住股市，睇住當日熱炒板塊係咩，有時輪動速度好快，一兩日就玩完，資金轉去炒另一個板塊。今次香港市場有少少炒作板塊輪動味道，大家覺得大市唔升，但熱炒板塊嘅升幅就好厲害。
炒作不停VS泡沫破裂
周末同中環茶友吃飯，講到樓市同股市炒作。有個茶友係樂觀派，以美國現時貨幣政策，佢覺得大市可以不斷炒落去。我們可以稱佢為「炒作不停派」。我就抱另一個觀點，覺得投資市場泡沫不斷脹大，總有破滅一天，即使唔出個大蕭條，出現一個三、幾成嘅深度大調整，已經可以殺死好多人，我呢一派可以稱為「泡沫破裂派」。
我首先為對家講話，點解以美股為首嘅全球投資市場會炒個不停？我認為主要係因為各國極度寬鬆嘅貨幣政策同利息低企所致。現時歐洲同日本喺度放水，美國縮表以緩慢速度進行，短期唔會對投資市場構成壓力，加上利息好低，現時聯邦基金利率1.25厘，雖然比起接近零嘅低位升咗1厘有多，但係歷史上仍然係低息水平。以上一浪泡沫爆破為例，聯邦基金利率喺2006年曾經升到5.34厘高位，更唔好講1981年要打擊通脹，聯邦基金利率曾經升到17.46厘！持續低息令資金成本相對便宜，鼓勵投資炒作。
我認為仲有一個背景問題，就係美國甚至環球通脹持續低企。喺80年代初，美國大幅加息前夕，美國通脹喺1979年上升到13.3%高位，逼令中央銀行大幅加息控制通脹。如今放水放得咁寬鬆，美國通脹只有1.69%，2%也未到，對聯儲局加息嘅壓力好低。
科技創高 電訊試底
通脹低企原因好複雜，首要原因係環球經濟仍然低迷，冇重燃蓬勃嘅發展，投資唔活躍，亦令到人工唔高，通脹自然唔會高；第二個原因係2001年中國入世後，大量廉價商品供應全世界。中國工藝好，生產成本低，等全世界可以享用價格低廉嘅中國產品；第三係由於互聯網巨企湧現，搶走好多傳統行業生意，以美國零售業為例，估計今年將會有7000間要結業，導致大量人員失業。依家經濟有好多自由職業者，他們唔自認為失業，就唔會畀失業統計搵到出嚟。喺亞馬遜、谷歌、facebook等企業賺大錢嘅同時，有好多公司倒閉，喺呢種環境下，勞工議價能力唔強，工資好難上升。
結論係由於通脹增長慢，聯儲局加息壓力唔大，收水速度唔快，一路延展環球股市同樓市繁榮期。我相信泡沫最終會爆破，爆破嘅契機係通脹比較快速上升嘅時候，但呢個時候似乎唔會咁快嚟。因此即使你認為某啲投資產品已經好貴，如果冇好似樓咁有限售措施控制嘅話，「投機的我」跟風短炒，亦係搵食之道，炒股食得鹹魚抵得渴，夠膽去炒一啲當炒嘅股份，有可能升到你唔信，穩陣少少就定好止蝕去自保。喺利息低迷嘅環境下，炒家通常會跑贏收息投資者。你睇科技股大升創新高，電訊股近全年低位就知啦。
陸羽仁
金融High Tea 舊文
來源 source: http://hdfin.stheadline.com
