【實力取勝】其中一注獨贏787（陳承龍）（第148期）
2017-10-26 17:30:11
孫柏文同高明成日話要一注獨贏，但小弟一日買買賣賣好多股，所以只能其中一注獨贏（當然注注都係博佢Win先會買啦）。呢排見底股比創新高股份彈幅更勁，單睇利豐（00494.HK）已作滿分
示範，與利豐有密切關連嘅利標品牌（00787.HK），就更加值博。
利標品牌係於2014年由利豐分拆出來送畀股東，主業各大服裝、鞋類、時裝配飾及時尚國際品牌，產品供各大國際百貨集團，另與好多大型超市連鎖店、零售商建立電子商務渠道，再配合利豐支持，生意模式極有效率。
利標分拆後價值一直未作合理釋放，股價長期大落後，好在去到今年出現大轉機，首先係3月結財年經營溢利重複增長，顯示已步出低潮，而利豐最新公布嘅6月結業績，遠較市場預期為佳，呢段業績期有大部份時間同利標重疊，所以利標於9月結中期業績應該超勁。
利標每股NAV高達2.28元，現價僅0.95元，而大股東馮氏兄弟眼見利標咁大折讓，相信不離幾個部署：1）學新世界（00017.HK）將新世界百貨（00825.HK）私有化咁，將利標私有，以享肥美差價（利豐派中期息高於盈利，意即馮氏兄弟大把子彈在手。）2）養肥利標盤數，將市價追貼合理價。3）善價而沽。
利標現只處今年低位略高水平，利豐早前大幅裂口高開持續走強後，已道明整個利豐系已見底，故利標爆升，指日可待。
盤路方面，富昌仔日日炒出炒入，搞到個場旺曬，啲貨亦都收到乾曬，向上炒一穿位就會絕塵。大倉方面，基金股東Sun Life Financial, Inc由持有11.8%減持至8月底的4.6%，佢一沽少過5%就開始爆升，同一時間，大華繼顯（UOB）狂買51球，加上小弟亦都買到瞓瞓哋身，日日都唔見佢有大貨沽，證明已經乾過阿婆。再睇上述私有化、執靚盤數同賣盤三個推測，中是但一個都掂過碌蕉，總之有料到。小弟已經買到一褲都係，第一個目標係升穿1蚊，第二個目價係NAV一半1.14元，升穿再博1.5元水平。
實力取勝 - 陳承龍 舊文
來源 source: http://www.winmoney.hk
