中環在線：中大爆內地星級分析員圍威喂
■顧朝陽（右）稱，潛規則運作下，散戶成受害者。
無論散戶定大戶，都會留意大行報告，唔少人仲會跟住投資建議買貨沽貨，不過如果你喺內地，睇到股票分析報告就最好諗真啲先跟注喇，事關一份中大商學院有份參與嘅論文提到，有啲股票分析員或者會受人脈關係同自
身潛在利益影響，發佈立場偏頗嘅報告。簡單講即唔係真分析，只係一個「圍威喂」遊戲。
同芬佬互惠互利
有份參與研究嘅中大商學院會計學院院長顧朝陽解釋，國內重視人脈關係，基金經理（俗稱芬佬）會利用同股票分析員嘅關係，令分析員畀芬佬揸住嘅股票一個靚仔評級。當報告出街而相關股票又有炒作嘅話，基金表現自然更加好。
咁分析員有乜著數？顧朝陽就話，芬佬可以投票畀相關分析員，令佢哋晉身「星級分析員」，到時唔單止知名度提高，薪金都有機會大幅上漲。佢又補充，芬佬亦會傾向喺相關分析員所屬嘅經紀行進行買賣，順勢幫埋經紀行賺傭金。
顧朝陽認為，喺呢種潛規則運作下，散戶自然成為受害者，雖然「關係」呢個概念難以規管，但佢認為監管當局都可以做啲嘢，例如建立完善嘅防火牆、規定基金唔可以將多過三成交易業務分配到同一經紀行，甚至限定單一機構所擁有嘅基金公司數量之類。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
