抽完閱文 留力抽雷蛇
2017年10月27日
由股王騰訊(700) 分拆出來嘅網上書檔閱文(702) 招股，有中環茶友話，之前隻眾安在線(6060) 招股，陸羽仁唔係咁推介借孖展認購，呢次閱文上市，孖展爆晒棚，咁又點睇呢？
退票資金未必返得切
對於閱文，陸羽仁認為若有閒錢實錢，不妨入表申請，而且可
以去盡少少，唔使點留力，點解咁講呢？先講抽眾安，佢招股前唱到好熱，好多頂頭槌飛，係呢啲情況下，借孖展要計利息成本，再加期間凍結資金嘅機會成本都唔細，結果眾安上市最多升咗近五成，計落用孖展除笨有精，但唔好忘記佢首掛頭兩日升幅唔大，尤其去到第二日升幅縮到得番幾個巴仙，所以上市後買佢應該仲着數過借錢去抽。
至於閱文情況有啲唔同，呢間公司由騰訊分拆出嚟，已有較成熟嘅營運模式同業績，估計號召力比眾安高，加上佢集資額細啲，除非市況有重大變化，否則佢掛牌後升幅應該好過眾安，上市頭一兩日平買機會唔大，所以如果抽到，應該都可以穩執一、兩成利潤。由於佢集資額無咁大，未必可以做到一人一手，所以如果想分到股，最好就係分名用實錢入多啲飛。由於銀行依家利息仲係好低，用閒錢去抽基本上無乜成本，所以去盡啲都唔怕，反而抽一手、兩手就驚抽唔中蝕手續費，所以錢多可以分名，或者搵啲免手續費嘅銀行，若然只有幾萬銀，或者可以考慮只入一張票增加分一手機會，好過份名全部抽唔中。
要留意嘅係另一隻科網概念股雷蛇下周可能會上，屆時退票未必返得切，若然想抽雷蛇就要兩手準備嘞。
拆息排高借孖展成本增
至於借孖展抽新股情況就複雜啲，因為市況熱，借錢成本貴咗，尤其噚日拆息都扯高咗唔少。即係要防一旦市況改變嘅風險，又怕大飛只分得少貨，計埋借錢利息成本太貴。如果閱文同眾安比較，閱文嘅業務穩定性高啲，萬一坐艇都應該無眾安咁驚嘅。
睇番閱文首日招股，情況都幾「墟冚」。本地券商耀才證券行政總裁許繹彬話，客戶預留孖展額現已超過300億元，公司或會因應市場需求，唔排除可能進一步加碼到400億元。佢仲透露，「頂頭槌飛」數暫已預留超過30張。唔少客戶為求「中多啲」而採用人頭戰術，今天分行更出現排隊等開門認購，以及出現查詢嘅人龍。另外銀行都加入搶客，繼中銀香港(2388) 同恒生銀行(011) 後，大新銀行(2356) 都想分一杯羮，申請閱文新股貸款利息低至1.25%同免手續費。
至於掛牌後曾爆升嘅眾安在線就有負面消息，中國保監會公佈，近期海南保監局發現，海南某區域性保險專業代理機構同眾安在線簽署保險業務代理協議，代理銷售眾安嘅保險產品。海南保監局對呢個合作模式進行咗分析，發現蘊藏住一定風險。公告話，眾安在線同沒有自營網絡平台、也不能與第三方網絡平台合作嘅區域性專業中介機構合作，合作模式係將線下客戶轉到線上嘅方式，涉嫌違反經批復嘅業務範圍中「與互聯網交易直接相關」嘅要求，互聯網保險公司涉嫌超範圍經營。眾安股價噚日大跌3.8元，跌幅4.7%，報收76.85元。
科網新股掀起熱潮，成為市場焦點，大市喺美股調整下，就變成有啲失焦，恒指收報28202，跌100點；國企指數收報11446，跌47點，成交金額842億元，準備生仔嘅騰訊(700) 跌咗1.4%，收報347元，唔排除有人諗住沽咁啲去炒新股，令佢股價有啲壓力。
陸羽仁
金融High Tea 舊文
來源 source: http://hdfin.stheadline.com
