智取大市：打巷戰兩大要訣
■近期港股氣氛轉冷，散戶情緒由亢奮轉為控制持倉，反應十分靈敏。 資料圖片
港股投資者反應之快，可以從近期港股氣氛轉冷之中睇得出，只係幾日偏軟，就令散戶情緒由亢奮轉變為割禾青、控制持倉，短短一星期就令唔少投資者情緒作出一定程度改變，反映散戶對市場靈敏度大增，
一有風吹草動，散戶已經將持倉減到安全水平。港股年初至今直線上升，冇大調整，散戶反應靈敏亦係主要原因之一，因為震一震，啲冇信心嘅短線客已經震曬出嚟，於是一日未見終點，大戶亦毋須大震倉多此一舉。當然，呢個劇本唔會無限Loop落去，畢竟升咗10個月了。
兩三星期前，小弟發表中線調整至少一兩個月嘅睇法，恒指如預期回落幾日。最近兩日，市場上唔少人估後市調整，小弟變為主流，多少有點不安，試問個個估調整，又點會個個成功高沽低買咁爽？於是喺市場反應過敏之際，整固初期較大機會進入巷戰，唔似直線下跌。
打巷戰要注意乜？第一，夠唔夠打。如果閣下近期於大市調整期間一直戰鬥，但戰績保持喺歷史高位水平，證明你夠打，手風順後市尚可再戰。如果近期股票倉淨資產開始偏離高位，證明唔夠打，可選擇忍手。第二，都係嗰句，宜撈不宜追。可以買乜？不妨睇返上一期。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
