笑到最後：博年底前見三萬點
■今年港股主題係強者越強，懶得做功課的話，可買騰訊。 資料圖片
今年只剩低兩個月，一般相信升嘅空間其實有限，加上慢牛唔少人都賺夠，準備收爐，但以今年反常嘅現象來計，越覺得得返番兩個月放軟手腳，越有機會臨尾爆冷，所以高明估今年年底前恒指會見30000點。
年
底前見三萬點，現水平計其實只欠1,397點，即使爆冷亦都只係小冷。因為十一黃金周已經試過一次，當時個市偏淡，仲要黃金周冇北水，大市反而連續四日升最多1,204點。
博12月再升，理由就係過往12月港股都較靜，因為基金經理放假返鄉。雖然並唔係等同12月一定會跌，但成交通常都偏低、股價唔鬱。上述背景就同十一黃金周一模一樣。
今年高明最大嘅得著，就係同一班朋友玩「財漽會」模擬倉遊戲，遊戲目的就係要輸曬啲本金。高明身為參賽者同埋計數嘅人，發覺今年撇除合股等財技出現之外，只要揀圖表及基本因素最差嘅股票，當股價跌唔落，配合壞消息就會反彈。財漽會大部份人都揀表面因素差嘅股，結果成日揀中爆升股，完全違反成立目的。以高明為例，曾經揀過陽光油砂（2012），通告話與債券持有人的長期延期協議，高明即刻諗，即係冇錢還箒，仲唔係壞消息？結果股價連爆四棍最多升47.5%。
用同樣嘅思維去諗，近幾個月已經有人吹淡風，唔少基金經理會鎖定利潤，大部份資金落入新股，年底前連續幾日打突擊唔出奇。
年底博大市升，首選兩隻：騰訊（700）及平保（2318），買呢兩隻技術含量最低，今年強者越強係另一個主題，懶得做功課的話，就買升嗰隻。只要大市未爆煲，呢兩隻都會升得勁過恒指。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
