經濟客艙：
炒燶iPhone X的啟示
■iPhone X有齊「限量」再跟10周年紀念版兩大元素都炒唔起，皆因少咗內地用家幫手接貨。 資料圖片
買唔到iPhone X，又抽唔到閱文（772），原來有錢唔係一定得。iPhone X開賣首日，轉手並非賺兩個開。香港嘅果
粉確實忠誠，「in iPhone we trust」，堅信i炒Phone係有得賺。呢種憧憬未必需要數據支持，人人話買啦買啦，只用數分鐘瘋狂按F5都唔試咩。
港人鍾意炒炒賣賣嘅熱忱從來未降溫，炒iPhone、炒樓、炒股都得。不過，炒iPhone又未必好似炒樓咁，越炒越貴，官網定價冇因為炒風加價，最多都係每年推新機而賣貴一、兩成。買家又可以趁新機推出，以更抵嘅價錢買返舊款機。炒iPhone又未必好似炒股咁，因為落錯注而蝕到渣到冇，因為限定每人最多買兩部，輸極有譜。就算預訂當日碌卡慘被Cut單，都有飛行哩數補返。
點解今次有齊「限量」再跟10周年紀念版兩大元素都炒唔起，甚至炒燶咗。或者果迷仍然相信有內地用家幫我哋接貨，實情係內地人有錢都未必選擇iPhone，有Oppo同華為嘅其他品牌嘅Android機可以揀。香港同內地仲有千幾蚊差價，但內地官網撳極仲有貨，又可以做分期月供，搵唔到咩理由來香港掃iPhone。
由炒iPhone4首日轉手賺過萬，到iPhone X今日轉手僅賺數百，相信好多果粉唔係首次抽iPhone。經常話往績唔代表亦唔保證將來表現，但果粉總帶著過往轉手大賺經驗來決定，加上「限量」出貨，引發無限憧憬。抽唔到iPhone X，最多憧憬落空，有部新手機自用。總好過借孖展抽閱文一手都唔中，手續費連息都蝕埋，抽新股最痛算這種。
Captain Cool
經濟客艙 - Captain Cool 舊文
來源 source: http://hk.finance.appledaily.com
