中環在線：上海姑爺出差
朱玲玲護照頁數唔夠
■朱玲玲不時陪老公羅康瑞出席活動。資料圖片
「上海姑爺」羅康瑞呢個星期以貿發局主席身份帶團去吉隆坡「In Style．香港」論壇，佢愛妻朱玲玲以往多數隨團同行，不過今次就唔見伊人，原因竟然係因為玲玲本護照頁數唔夠！
話說羅康瑞周一（6日）
下晝起飛，同老婆去到counter check-in時，港龍地勤人員提醒咗一句，話朱玲玲本護照只係得一版空白，唔夠兩版，所以未必能夠入到境，所以玲玲就折返咗。
查實一個印仔都好細個箒，有乜理由會係咁嘅原因唔畀入境？羅康瑞順便問過當地政府官員，得出嘅結論係馬來西亞入境政策真係咁，華華就覺得似乎有啲僵化喎。
羅康瑞：發夢都諗住一帶一路
另外，羅康瑞今年6月續咗約，做多兩年貿發局主席，日日都推廣一帶一路，佢都係咁意呻兩句，話呢份工真係唔容易做，「老婆又投訴，好似度日如年咁啊！」但轉個頭又話份工好有價值，因為對香港公司真係好大機遇，「我發夢都諗住一帶一路啊」，咁唔怪得老婆投訴喇。
華華順便又關心嚇羅家爭產風波發展成點，羅康瑞一聽到就話：「又提起我嘅傷心事！」坦言暫時見唔到呢場紛爭有解決嘅空間。咁近排有冇探媽媽呢？佢就話好少見到佢，有一定難度，但就唔係因為工作忙，箇中原因，大家可以自己領會。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
