【股場解密】北水炒港股 好唔過散戶（歐陽風）（DEC 06）
2017-12-5 22:51:34
早一輪港股炒到興恰恰，北水南下成為炒作個股的主要動力來源，也因此好多人誤以為北水莊家才是真正的股市莊家，再唔係外資大行與外資大戶的專利。然而一個科技股跌浪，令大家覺醒原來唔係呢一
回事，北水大媽買股眼光不比外資大戶好，更加可能及不上一般本地散戶。
以北水愛股中芯國際（00981.HK）為例，業績前炒上14.76元，原來唔係業績勁，純係因為多大陸券商唱好晶片股所致，而中芯一向業績無驚喜反而經常差過預期，北水們只因熱情買得過火，到業績後一瀉千里，高位計至今唔見了4蚊。
其他因北水追捧而熱炒的概念股都有此現象，北水大媽熱烈追捧的股份未必代表股價會長期跑贏，反而有一大部份北水愛股炒完就變長期低迷股，北水亦被迫坐貨淪為弱勢股。
當然對本港股民而言跌市真正重災區是騰訊（00700.HK），無論北水定南水，業績後一面倒相信騰訊股價有升無跌，即使跌了亦會升返，結果卻是自11月21日見頂後，騰訊股價易跌難升，兩次出現的短暫反彈過後，都是更深更勁的跌幅，而炒騰訊的散戶多數炒CALL輪或牛證，輸錢幅度更為驚人。
呢次跌市指數唔算跌得多，但散戶受創幅度必定是今年來最可怕，短期即使有什麼概念股都未必再炒得起，年尾收一收爐亦好合理。
#股場解密 #歐陽風
作者簡介：擅長鑽研公司通告與財務報表，發掘細價股、財技股及增長股
股場解密 - 歐陽風 舊文
來源 source: http://www.winmoney.hk
