收市閒情：當騰訊變成邪教
■炒股千祈唔好抱住「邊度跌低，邊度起返身」呢種觀念。 資料圖片
公元2017年11月，在港股國度入面，戰事仍然不斷。當然每場戰爭，都有攻無不克、戰無不勝嘅英雄，呢一輪，嗰位當時得令嘅大將軍，係人稱「Q將軍」嘅騰訊（700）。
「用兵之道，在於兵貴神速，不貴
久，我哋要半個月內攻破400蚊水平」Q將軍一聲下令，眾將豈敢不從，果然，騰訊領軍成功擊潰400蚊，史稱「四百之戰」。
Q將軍「四百之戰」後，聲威大震，更令不少百姓，諸如骨骼精奇之練武奇才，或燕瘦環肥之毒男廢青，均甘心成為其麾下，甚至貼錢打工，重貨買牛。「買咩正股呀，買牛證一日都賺幾倍啦！」「唔好沽住呀！700會繼續升㗎。」越多人掃牛，班副將輪商就幫忙調兵遣將，輪商就買多啲正股對沖。結果，於11月21日，Q將軍一舉攻破439蚊大關。
不過，世上哪有不敗的戰神，「12月恒指季檢，基金要沽貨啦！」「聖誕鐘、騰訊終」喺港股跟紅頂白嘅世界，哪有大戶會同你講感情，Q將軍節節敗退，「騰訊唔會去到400蚊架，我哋用隻牛血戰到底！」
一語成讖，400蚊收回牛證行先死先，18隻騰訊牛證當場死亡；385蚊陣地一日失守，39隻牛證即場打靶，涉及約9億份街貨，死傷枕藉、屍橫遍野。網絡上哀鴻遍野。
「Q將軍」分明大勢已去，不過此時，只要騰訊升少少，就一定有人衝出來講，「轉勢啦！要買牛」「是時候反彈了」。
結果有朋友星期一，買四隻極貼價「勵志神牛」，坐過夜，星期二一夜清倉……有朋友之前借財仔買700牛，依家欠街數幾球，然後走去問人借錢，唔係為還借，而係話「騰訊聽日一定升」……睇到呢度，我就知此國度出現一種邪教，叫「炒700唔會輸錢」的邪教。
有朋友話，炒股哲學，如果你抱住「邊度跌低，邊度起返身」信念，結果，只有一個，就係「就算你起返身，你最後會輸得仲甘。」
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com
