一路一帶 - 斯郎 2018年2月1日
一路一帶：新人盲搶樓的故事
■樓市喪升，除了大陸人不問價買樓之外，其實唔少香港人盲搶樓都係原因之一。資料圖片
筆者早前見證友人豪斥3,500萬買何文田新盤，看到「有些少錢」的大陸人不問價買樓，其實「冇乜錢」的香港人，同樣都係盲搶樓。筆者再見證另一對新婚朋友，結婚不到半年才懂得去買樓的趣事。
新人朋友準備首次置業，對買樓零知識，但在筆者眼裏，兩人買樓尤如去超市買零食一樣，對「出位價」、「超筍價」等宣傳，受經紀遊說後，好似撞邪一樣，咩盤都話好，但其實兩人只係睇咗唔夠5個盤，就件件都想買。
新人跟筆者說，睇中元朗站附近一個舊樓單位，實用面積270多呎，業主開價400萬。筆者當然立刻查歷史成交，同幢中層同一面積單位，兩星期前成交才365萬，呎價約1.38萬元，已經創了同幢新高，但新盤放售，業主隨即獅子開大口，叫價升至呎價1.5萬元。其實一個月，甚至半個月賣貴一至兩成的癲價經常發生，絕對唔奇。
筆者決定和朋友坐低傾傾，試了解癲價如何發生，聽到原因真係O曬嘴。原來兩人計過數後，想買樓作投資用途，靠收租供樓，老婆繼續和老公及奶奶共住，呢種慳錢做法非常正確，阿嫂心急買樓，怕樓價再大升，朋友話：「佢同奶奶同埋外母都傾過，兩人都支持佢買！」家人支持就係買樓最大動力。雙方慈母出手，半個月賣貴一成冇問題。
隔咗兩日，朋友再問：「喂，洪水橋有個新盤入夥，業主開385萬即走，好靚裝修喎！」睇一睇，當堂嚇一跳，190呎連70呎花園，呎價超過兩萬。阿嫂睇完評語：「裝修好靚，好似酒店咁，幾好吖！」兩人家住土瓜灣區，近沙中線站，筆者曾建議過買返同區，租盤不愁冇客，將來自住亦近娘家，不過阿嫂嫌該區舊樓太舊。
其實一心投資用，當然揀不連裝修的單位，避開溢價買樓，何必要送個裝修畀租客，自己住時又變殘呢？兩人買樓意志十分堅定，筆者只能盡力去畀意見。要知道買樓並非買菜，尤其是二手盤，唔睇返十幾廿個盤，又點知啱唔岩心水呢。兩人買樓決定，暫時基於兩大因素，雙方父母支持以及裝修好靚，樓價不停破頂，其實多得佢哋唔少。
斯郎
https://www.facebook.com/oneroadonebelt/
斯郎
~TITLE_S~一路一帶 - 斯郎 2018年2月1日 舊文
來源 source: http://hk.finance.appledaily.com
