智取大市：買股對沖加價熱
■消費需求轉強，莎莎似乎進入全面復蘇狀態，值得留意。資料圖片
四方八面都係消費品供不應求嘅消息，由台灣人搶廁紙，去到傳聞娃哈哈加價，做瓦楞紙嘅玖紙（2689）亦預計下半年度要加兩、三次價。呢股加價浪潮，實在殺企業一個措手不及，皆因唔少行業多年冇增產，上遊更掉
返轉要淘汰落後產能，但需求一返嚟嘅時候，供應未pick up到，於是頻頻加價回應。
環球消費需求係強嘅話，唔少板塊長遠盈利前景都唔會差，問題係邊啲已反映利好因素，邊啲未盡反映。
玖紙都算係值博率唔錯嘅股，下半年度有力加價嘅話，下半年業績都有憧憬，原來將上半年度每股盈利乘二，市盈率都只係6倍？大行睇淡下半年度盈利表現，預測市盈率仍低至8倍，都唔貴。股價急升一日已經突破舊年11月到𠵱家嘅長方形蟹貨區，沽壓似乎已減輕。
另一隻值得留意嘅係莎莎（178），新春期間同店銷售按年升12.2%，似乎進入全面復蘇狀態，而虧損嘅台灣業務結束等同止蝕，短期陣痛可以換來長遠盈利能力，喺長遠收入增加、部份成本減少之下，券商預測截至2019年3月底止市盈率20倍唔夠，呢隻派息率近100%嘅高息消費股，似乎開始諗得過了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
