大股東唔一定要做股神
2018年02月28日
美國股神巴菲特年年向股東寄出的信件落足心機，被視為當年的投資啟示錄。隨著信件寄出，他亦會接受傳媒訪問，日前他同媒體透露會回饋股東，即係令公司股價同大市向好，可以話一言興邦。
股神巴菲特的投資旗艦巴郡坐擁巨資，去年又無乜大型收購，原因或
者同資產價格高企，講求信奉價值投資的股神唔係咁易搵到大手筆落注機會。佢被問起點處理大量現金時，不排除會回饋股東，估計方法唔係派息，而係回購股份，派息同回購分別係派息即係畀番錢股東自己使，回購就係等同代表其他股東投資番係公司股份上。股神回購自己股份，等如係話市場上佢發現唔到有另一番股票比自己公司更抵買。
炒和電派息要知價
股神公司咁多年都唔派息，理念係你買得我股票，都要係想我代你投資，如果要錢使，咁你賣股咪得囉，使乜等派息呢，所以股神派唔派息有其理念，佢明言不派息，股價就不跌反升。同股神相反，和記電訊(215) 就因為宣佈業績無派息，昨日股價大插14.7%，收2.85元，好明顯市場係對公司無放水覺得失望，拋股造成急跌。
和記電訊去年出售固網業務，作價145億元，比昨日公司市值仲要高啲，係公佈業績前股價開始冉冉上升，相信投資者就係炒佢手頭大把現金，所以炒佢派息，升到去3.5元收市價。最後公司宣佈業績，雖然純利因為賣產大升，但就無特別息派，董事會叫小股東小安無燥，若然公司係年底仲未有大型投資，咁就會考慮派特別息。
對於和電呢個決定，有跟開呢間公司的中環茶友坦言唔覺得意外，佢去年係和電宣佈考慮賣產時曾經走過一轉，當股價升破3元後就逐步沽貨離場，呢次業績前佢就無跟炒，皆因根據該系公司經驗，公司賣產之後多數會先揸住啲錢一段時間，睇睇有無投資機會，然後先決定派息，所以呢次派息機會只係一半半。如果以目前電訊市場仲打緊割價戰，3元以上股價已經有啲偏高，缺乏值博率。
新地股價郁得慢想拆細
茶友話，和電同股神公司唔同，股神公司係投資控股，它落注的範圍無限制，和電主要做電訊，而家電訊市場好的投資機會不多，如果無好的投資機會，咁大股東都唔需要做股神堅持揸住筆錢投資，因為派息畀股東自行再投資係負責任表現，所以年底派特別息機會唔細，但由於要等一段時間，加上電訊市場競爭仲係激烈，佢會等到股價接近2.5元左右先考慮撈底。
除左和電外，同屬一系的電能(006) ，將於下月中旬公佈全年業績，市場又係玩緊猜派息的機會。大行花旗早前發表報告，預料電能屆時宣佈派發特別息每股7.5元，支持短期股價上升，而長建(1038) 將是主要受益者，預料可獲取約62億元股息，有助支持其未來發展。電能坐擁巨資，過去兩年都玩派息遊戲，大行咁做得當然有啲理由，只不過呢樣嘢變成預期之內，所以炒佢派特別息必須好理性。嚴格而言利率向上，對公用股唔係咁有利，若然高追被綁就會吃虧，現價66.8元炒佢派息，水位勉強叫做有得諗，若然再升就要留意值博率。
呢排公司業績宣佈多，睇成績表同派息買賣機會不少。新地(016) 公佈截至去年底止中期業績，半年度基礎溢利錄199.73億元，按年升37%；每股基礎盈利為6.9元；派中期息1.2元。新世界發展(017) 同期股東應佔溢利錄112.7億元，按年升16倍，主要是由於分部業績改善、淨外匯收益及投資物業公平值變動增加；派中期息0.14元。兩隻股份都隨市下跌，地產股業績受惠市道多數靚仔，新地董事會將於6月商討拆細股份問題，似乎係對股價表現唔係咁滿意，想趁業績買賣者睇位可以博炒短線。
公司派成績表普遍唔錯，但大市受A股回調影響，又再升一日跌一日，恒指收報31268，跌229點；國企指數收報12646，跌187點，成交13769億元。騰訊(700) 連跌兩日，收挫1.6%，報446元；中國平安(2318) 下滑2%，收報85.35元；港交所(388) 跌2%，收造289.8元，強勢股基本上齊齊唞氣。
陸羽仁
金融High Tea 舊文
來源 source: http://hdfin.stheadline.com
