財路：內需股呢隻最抵買
■中糧油聚焦米麵油戰略，食住內需回穩升溫，嚟緊日子，掂過碌蔗。互聯網圖片
中糧油（606）已經發咗盈喜，集團聚焦米麵油戰略，食住內需回穩升溫，嚟緊日子，keep住掂過碌蔗。內需瓣數當中，中糧油預測PE亦係至平選擇，勁抵煲。
中糧油上月發盈喜，估計就快派2017年成績
單，盈利約30億元。粗略計數，就算扣除當中出售生物燃料帶嚟9億元淨收益，中糧油盈利仍高達21億元，比對過去五年成績單，都係最省鏡。現價3.58元，莫講過唔到五年股價新高，就算比對2015年高位5.15元，仲係講緊累跌近31%！
又中糧油全年成績單靚仔，皆因各主打瓣數回勇，以上年上半年為例，唔單只毛利翻過一番到36.4億元，毛利率同比亦增加3.9百分點，到8.2%。中糧油係全國第二大包裝食用油品牌企業，旗下小包裝米麵，亦喺內地處領導性優勢。
國家統計局數據，上年頭三季，反映最終消費嘅糧油、食品零售額1.18萬億元人仔，同比增加10.6%，食住內需回暖條水，中糧油掂當。場內專業預測，中糧油今年再冇出售業務一次性收益，今、明兩年EPS0.326元同0.37元，預測PE10.9倍同9.5倍，兩年預估PB得0.62倍同0.59倍。
場內內需瓣數康師傅（322）今、明兩年預測PE33.2倍同29倍、統一（220）23倍同21倍，同中糧油同系統嘅中國食品（506）預測26.2倍同21倍、蒙牛（2319）預測PE23.1倍同19.3倍，中糧油至抵搞。
呢期大行包括里昂同大摩，都睇好內需股，有大孖沙睇好，為呢瓣加添鑊氣。買中糧油，煲翻半番到5.37元咁計，明年預測PE14倍，未追到上邊任何內需瓣數。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
