瑞聲逆漲引人沽
2018年02月06日
美股上周五大插，港股開市即跌超過800點，隨著內地A股拗腰反彈，港股下午跌幅收窄。同美國急插比較，港股最後跌356點就唔算勁啦。
A股回彈撐住港股
上周中港股市先美股一步調整，主要係內地擔心部份資產管理計劃要清盤賣股，導致個股出現閃崩。喺
一輪拋售後，內地官員放風，要求有關沽售要喺維護市場秩序下進行。
內地股市早前調整咗一輪，本已減壓，加上出現維穩訊息下，滬指昨日在權重股護盤作用下午後回升，變成美股跌內地股市唔跌，上證指數收報3487點，升25點；深證成指收報10836點，跌88點。
A股成為定海神針，港股雖然低開886點，但一開已接近全日低位31712，午後同A股一齊回升，港股跌勢有所收窄，恒指收造32245點，挫356點；國企指數收報13479點，跌58點，成交1699億元。
由於跌市受美國債息攀升影響，國際金融股跌勢明顯，滙控跌1%，收報82.85元；友邦挫2.1%，收報63.8元，兩股合共拖低恒指86點。息口敏感的本地地產股向下，信和置業(083) 跌3.7%，收報14.1元，為表現最差的藍籌股；九龍倉置業(1997) 跌2.8%，收報53.5元；長實集團(1113) 跌2%，收報73.15元；新地(016) 則跌2.3%，收報130.3元。
內銀巨股午後倒升，建行(939) 升0.7%，收報9.01元；工行(1398) 升0.7%，收報7.44元，兩股合共貢獻恒指33點。昨日想等建行插深啲去買，但佢最低只係見過8.6元，之後就急彈，唔係咁易買得到。
領展跟住美債持續跌
通脹預期升溫，要留意係息口敏感的領展(823) 已連跌5日，累挫逾4%。美國上周五公佈薪酬按年增長2.9%，創2009年以來最大增幅，反映在勞動力持續緊張下，薪酬增長開始加快，通脹增長有機會加快，美國十年期債券孳息率繼續飆升，突破2.8厘水平，創2014年初以來新高。
美債息持續上升，不利以收息為主的公用股及房託基金。領展低開後持續橫行，收報67.15元，跌0.85元，再跌1.3%，成交額4.41億元。
陸羽仁過去曾經講過好多次，領展管理層做咗好多嘢去催谷股價，但始終擺脫唔到同美債債價同步、同美息返向的關係。美債債價升、領展升，如果美債有可能踏入熊市，咁照計領展股價都唔會好靚仔。
由於今次跌市係由債息向上影響，估計市場需要時間觀望利率表現同消化，雖然港股現水平跌幅唔大，大市氣氛唔係好恐慌，暫時仲未肯定調整已經完結。由於指數喺高位回調唔多，炒反彈空間唔係好大，加上美股可能尚未調整完畢，中線持有係咪應該入貨，就真係要睇手頭銀彈。如果現金太多當然可以入啲，否則現水位值博率仲係一般。
以大市累升逾4000點，指數昨日跌好正常，個別手機設備股仲回升，瑞聲科技(2018) 急升近5%，收報147元。手機設備股呢排傳出蘋果iPhone X出貨量遠低於預期困擾，股價相當波動。瑞聲股價回勇，或者係因為美國蘋果公佈盈利因為新手機行貴價路線，推動盈利衝上高位，所以炒番一轉。
蘋果iPhone X推出，口碑遠遜預期，主要係新產品突破性有限，加上定價高，所以無法掀起換機潮。
早前蘋果大為更改舊版運作速度惹來不滿，要減價換電池被視為業務警號。分析員相信，蘋果仲有好多後着，可以用來支撐未來幾年盈利，公司現金金額達到歷來新高，平均iPhone售價也激漲，但市場情緒普遍睇淡，令公司股價上周跟隨大市急挫4%，比高位回落近一成。
蘋果貴賣手機推動盈利雖然有益公司邊際利潤，但有可能影響果粉忠誠度，唔知維持得幾耐。蘋果手機貴賣，對公司利潤有幫助，但出貨量跌，對生產商就唔係好事。蘋果公司貴價賣機，未必等如會俾設備供應商賺多啲。昨日大市跌，瑞聲反而急升，雖然現價距離高位185元仲有距離，但都真係一個換馬沽貨好機會。
陸羽仁
金融High Tea 舊文
來源 source: http://hdfin.stheadline.com
