中環在線：
誠哥9億投地「大代表」再現長江
「曾經有一份真誠嘅愛擺喺我面前，而我冇去珍惜……」誠哥，你到底知唔知有位女子等得你好苦？
唔好誤會，華華唔係講緊紅顏
知己周凱旋，而係1997年「代表」長實地產以9億投地嘅婦人黃月鶯，喺誠哥宣佈退休當日，驚現長江中心！
徘徊大堂話想返工
話說上周五長和系業績記者會前，大約4點幾鐘，黃月鶯喺長江中心大堂貢嚟貢去，粉紅色冷衫襯紅噹噹外套，望落都幾精神。佢不時問招待處可唔可以上去返工，佢頸上掛住一張疑似「和記黃埔」卡片。睇真啲，佢張卡片寫住自己係和記黃埔嘅「僱主、董事黃月鶯」，不過錯處都幾多，例如當年和黃stock code係13，而非113。長實發言人都回應，集團冇呢位員工。
黃月鶯同長和嘅情緣，要由27年前講起。1997年10月14日，黃月鶯自稱代表長實李嘉誠，出現喺東九龍一幅地皮嘅賣地場上。這位中年婦人一而再、再而三出手「bid地」，嚇到一眾發展商拉隊走人。最後黃婦以8.9億元K.O.所有人，但最終因為交唔出定金本票，被警方拘留，政府破天荒收回該地皮，而黃婦亦被送入醫院，隨後證實她有精神病紀錄。
原來黃婦97年bid完地出院之後繼續喺地產界「打滾」，2003年已經率先去過長和系股東會搵誠哥傾偈，嚇到誠哥面青青要搵霍建寧擋駕。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
