【大茶飯】誠哥啲錢真難賺（青冰）
誠哥終於退休了，青冰在讀書時代，誠哥已經係叱吒風雲，尤其去圖書館借書，都會睇番港股經典收購戰，誠哥幾單收購及狙擊英資的刁，間接奠定了往後幾十年的基業。誠哥在記者會上話，如果投資者在1972年長江上市時以3蚊買入，一直揸到今天，計及紅股、拆細、重組及股息，
回報有1500倍，如果將股息再投資番買長江，回報有5000倍添。
這些數字非常有娛樂性，但實際上有幾多個投資者可以在當年上市價買得到，情況有如首日招股已超購千倍的毛記(1716)，派到俾你已經係萬中無一，莫講話長揸40年。青冰剛入行時，正值和黃賣橙，一刁賺千億，翻查記錄當年係衝上150蚊的，但那個就差不多是歷史高位，之後科網爆破，股價拾級而下，到2013年才重上100蚊，最後世紀重組前的收市價是115蚊，如果你當日冇沽，重組後和黃股東每股可以獲得0.684股長和(0001)，及分拆出來的長實(1113)，恕青冰唔花時間去計當中的轉換及現時回報，只給你重組後兩者的股價，長實上市首天收市價為74.10元，上周五收市係70蚊，而長和當天係以118蚊收市，上周五係98.90元。
簡單啲講，你賣橙個日買，經歷十幾年的風雨，收息重組加分拆，相信即使唔使輸，回報也不會太高，買中電(0002)及煤氣(0003)，十幾年來財息兼收，青冰用彭博資訊看過，兩股財息回報有5至7倍。
結論相當簡單，也是近年來投資者對長和系的感覺：誠哥啲錢真難賺。長和系做事很少有春江鴨，你睇賣中環中心講咗大半年，不斷有報紙言之鑿鑿，最後都係流料，到最後11月賣得成，裂口66.95元高開，如果你當日衝了，現時只得3蚊水位，同期恆指升咗三千點啊。電能(0006)坐擁幾百億現金幾年都唔派，最後長建(1038)私有化電能失敗後一年才派錢，殺市場措手不及。最近的還有和電(0215)賣資產收番150億，市場憧憬必派無疑，股價累升兩成幾，結果業績後講一句，諗唔到有咩投資就下年派囉。
市場成日話近年長和咁難玩，係唔關誠哥事嘅，不過點都好，青冰自問道行低，誠哥(或鉅哥)的錢，留俾你賺啦。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
