Money Walker - El. 2018年4月4日
Money Walker：林鄭視野並不狹窄
■林鄭睇房屋問題嘅視野是否太狹窄？資料圖片
前天文台台長林超英話林鄭睇房屋問題太狹窄，筆者深信林鄭視野並不狹窄，以政府角度，單純透過增加土地供應以解決房屋問題嘅諗法，十分正確。
香港房屋問題成因千百個，就求其拎四個出來，從政府角度睇下。
第一，環球低息及量寬：香港行緊聯匯制度，政府無法控制息口，對於低息及量寬推高樓價，政府也無可奈何。
第二，內地買家需求強勁：政府已有辣招針對。至於加辣，如果陣間樓價真係因為加辣而大跌，繼而影響到地價、庫房收入同發展商利益，呢隻鑊政府入面邊個孭先？
第三，外來移民：外來移民主要係內地人，但香港冇單程證審批權，而且外來移民可以補充本港勞動力（好似係）。政府冇理由為咗解決房屋問題，而減少新移民數目。
第四，土地供應：將房屋問題爭議集中於土地供應，再將土地供應問題歸咎於反對填海聲音，既可同市民交待政府有做嘢，同時又唔會得失發展商，更唔會損害政府賣地收入。畢竟填海需時，樓價短期內唔會因填海令土地供應多咗而大跌，就算有影響，都係林鄭完成任期之後嘅事。
除咗話林鄭睇房屋問題太狹窄，林超英仲指外判制度同年輕人工資水平差，令到基層人士工作回報不斷下降，都係造成本港房屋問題嘅原因。
林超英咁講就唔啱，香港奉行自由經濟，企業職位外判同工資水平呢啲嘢都係商業決定，政府都控制唔到（好似係），而且香港已有最低工資保障基層員工。
其實林鄭面對基層劏房戶同麥難民，已經好努力同問心無愧，點解我地唔支持嚇佢呢（曲線要講明）？
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
