中環在線 - 李華華 2018年5月29日
中環在線：同誠哥意見相左點算好？
周凱旋：李生意見較重要
超人李嘉誠嘅紅顏知己周凱旋（Solina，圖），近年可謂成為「誠哥代言人」，不時見到佢為超人傳話，例如鍾意食邊一種素牛肉菜式咁。而超人正式退休後，全心投入第三個仔「李嘉誠基金會」，就更加多時間與身兼基金會執行董事嘅Solina相處。
自抽「紅顏知己」花名
Solina噚日出席杭州一個慈善活動時，就再為超人代言，大談超人退休後基金會嘅活動。向來好玩得嘅Solina，喺活動開始時先「自抽」，話自己喺香港有個朵叫「紅顏知己」，令在場掌聲笑聲四起。
Solina形容超人係最活躍嘅銀髮一族，指超人披上基金會嘅新戰衣後，最注重就係推動教育改革，覺得世界最大問題就係社會不公、跨代貧窮，如果教育做得唔好，係對未來一種罪咁話。
至於每年維港投資都投資咁多新嘅科技公司，Solina就話，超人會自己承擔所有風險，有賺嘅就拎去基金會，又引述超人話，一人嘅力量唔可以改變太多，要改變世界就需要大家一齊努力，同時仲要靠科技結合同理心再加上創意。
咁當佢同超人意見相左時又點呢？Solina就話：「當然是李先生的意見比較重要！」因為係超人自己嘅基金會吖嘛。
李華華
MAILTO:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
