金手指：俄鋁及雙重認證
■俄國政府話會有措施撐俄國鋁業，亦係為快來嘅股權重組後，同美國講數時儲子彈。 資料圖片
今日要update大家關於兩件之前數周講過嘅事。
首先，對上一篇，孫柏文對證監要我哋散戶，買任何股票實施嚴重拖慢交易嘅強制「雙重認證」，得到突破。
有人搵我傾偈，話證監有人
知揩曬嘢，不過啲官為交差升職唔可以向現實低頭，所以落實時會明存實亡。即係點解？即係將「雙重認證」點做，畀番啲行自己界定。
啲白癡銀行，例如中銀，繼續要求次次撳入買賣頁都要「雙重認證」，等得來、入埋盤，個價已冇咗。不過有股票行，第一次開app後，發個短訊畀你入密碼，之後永不再要「雙重認證」，擺到明就係「證監正XX，不過個牌你發，冇計」嗰隻。如果你想轉股票行，去FB到PM我。
第二想update大家，就係六月初面對制裁落實死期，我揸重貨嘅俄鋁（486）。𠵱家個關鍵係美帝要見到啲乜，先算「歐柏嘉已失控制權」。咁歐柏嘉係先控一間叫En+嘅公司，而En+就揸住俄鋁。
咁俄鋁上周突然所有母公司En+委派嘅董事，全部辭職，連歐柏嘉都起身。即就算歐柏嘉減持En+失敗，En+都鋪路賣走俄鋁。
咁噚日俄國政府話會有措施撐俄國鋁業（即俄鋁啦），亦係為快來嘅股權重組後，同美帝講數時儲子彈。當然，一日美帝未正式放生，一日都未派彩。睇對上幾日金仔同侵侵跳舞，都知劇情可幾𥧌迴路轉啊。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
