低吸大灣區地產股
2018年05月29日
港股仲有幾日就過埋五窮月，恒指彈番高204點，指數雖然造好，但上升股份同下跌股份數目接近，實際係維持上落市局面。
博規劃公佈氣氛升溫
五月份就快過去，有消息話可能喺月底公佈粵港澳大灣區規劃。呢個計劃過去幾個月講咗唔少，但具體規劃出嚟，
就會有清楚好多藍圖。中環茶友最近做先頭部隊去咗港珠澳大橋參觀，順便仲落埋中山食乳鴿。佢話O依家去中山食完乳鴿返深圳，塞車塞咗幾個鐘頭，但佢見到O依家起緊的深圳至中山通道，2024年落成後，兩地交通就唔使半個鐘，但為咗搞呢個項目，內地政府豪擲咗400幾億元人民幣，等同係港珠澳大橋咁上下投資，由此可見內地推動區內交通基建決心，所以成個大灣區，O依家搞得幾火熱。
大灣區蠢蠢欲動，資金搶先喺區內爭地盤，啱啱大昌微線集團(567) 公佈，計劃以兩億元出售位於惠州古塘坳針南山壽華科學園廠房土地，反映區內土地有價。大昌微線做生意連蝕多年，O依家賣廠就執番一筆，估計未來呢啲個案陸續有來。但如果要投資有房地產概念公司，買偏低工業股雖然平，但持續經營效益有限。
另一個方法係低吸喺區內有土地的內房股。好似雅居樂(3383) ，目前擁有預計總建築面積達3410萬平方米土地儲備，當中位於粵港澳大灣區，包括中山、廣州、佛山、珠海、惠州、江門擁有預計總建築面積達1110萬平方米土地儲備，佔整體土地儲備32.5%。以昨日收市價15.2元計，市盈率得8.1倍，息率有近六厘，睇佢股價一級級上，若然係睇好大灣區房地產前景，可以吼佢跌穿15元左右儲啲貨，穩陣啲可以定一成止蝕。
中石油燃氣概念發威
五月通常係靜市，加上市場觀望MSCI指數本周五(6月1日)重組影響，大市昨日成交跌至844億元，是三個星期以來交投最淡靜一天。大市方向感唔強，全靠友邦(1299) 同中石油(857) 撐起，兩股推高恒指115點，佔恒指升幅超過一半。由於石油輸出國組織傳出有意增加產量，國際油價偏軟，但摩根士丹利指中石油可望受惠內地上調住宅氣價，股價急升6.4%收報6.44元，為表現最佳藍籌股，推高恒指26點。
大摩炒作中石油增加油氣供應，主要係上個星期召開全國生態環境保護大會，之後三大石油公司均召開高層會議傳達學習貫徹大會精神，明確表示加大天然氣供應、提升油品質量不約而同成為它們下一步重點工作。中石油集團董事長王宜林，在近日召開的內部擴大會議上，提出推進天然氣產供儲銷體系建設、安全生產、污染防治、降本增效等有機結合起來，推動集團公司生產方式轉變和資源節約利用。另外他又提出，特別要加大內地天然氣勘探開發力度，統籌好國內外兩種資源。由於中石油喺燃氣業務上比較佔先，所以大摩就借呢個概念炒起佢。
除咗中石油，近排藥業股繼續當炒，好多股價都先後挑戰新高。石藥集團(1093) 將在下周一正式染藍，股價升3.8%收造26.05元；同屬醫藥股的中國生物製藥(1177) 更升4.8%收造20.4元。藥業股普遍市盈率高派息低，買佢哋的增長概念就要買領導性股份。有熟悉呢類公司的投行人士話，中國生物製藥管理層過去做併購或交易都得手，所以吸引基金捧場客。另一隻三生制藥(1530) 名下中國首個胰高血糖素樣肽-1(GLP-1)受體激動劑周製劑百達揚(通用名：注射用艾塞那肽微球)正式獲得國家食品藥品監督管理總局批准，股價乘勢衝破20元大關，動力加強下再創新高，收報21.95元，大升逾6%。
陸羽仁
金融High Tea 舊文
來源 source: http://hdfin.stheadline.com
