大棋局：貿易戰真的落幕？
■近期的中美貿易戰形勢，與四百多年前的小牧‧長久手之戰甚相似。資料圖片
想花點篇幅談一場戰爭。早前提及小牧．長久手之戰同中美貿易戰形勢相似，當中嘅戰略、打法乃至局勢演變都有值得借鑒之處。
鏡頭一轉回到公元1584年，即中國明朝之時，東方島
國日本正處於大分裂的戰國時期。原本統一天下之勢已近在織田信長眼前，但被部下反叛襲殺，最後織田家大部份地盤落入豐臣秀吉之手。
有個後生仔叫織田信雄，係信長第三個仔。豐臣秀吉原本係自己老豆條𡃁，信雄條氣唔順。該年3月6日，信雄發現身邊三個大臣已同秀吉暗通款曲，隨即斬殺三人。
消息傳到另一大諸候德川家康耳中，家康判斷戰爭就要嚟，3月7日馬上帶兵移向信雄居城一同對抗秀吉，因為家康係織田信長昔日盟友。
豐臣秀吉知道後，帶兵12萬人由大阪出發殺向信雄及家康集結的名古屋一帶。秀吉可調動的總兵力約20萬，家康4萬，信雄2萬，戰力有相當差距。所以家康決定集中兵力先有得打，先行搶佔小牧山城。名古屋一帶平原居多，小牧山係一座小山，居高臨下敵軍一有行動就睇到。秀吉大軍嚟到時處於被動，雙方陷入膠著狀態。
戰略多變 虛實難測
大家都搵唔到對方破綻，豐臣軍大將池田恒興建議用奇襲，既然德川軍集結在此，後防必然空虛，由佢帶兵兜後路直撲德川根據地，再兩面夾擊小牧山城必勝。秀吉同意，由池田恒興帶2萬奇襲隊出發。
另一邊廂，家康早就估對方一定會用奇襲，所以佢準備反奇襲。當快馬通報豐臣軍有動靜，家康旋即帶兵靜靜雞離開，只留下6,000兵，讓有「日本的張飛」之稱嘅手下第一猛將本多忠勝鎮守小牧山城。伊賀忍者探知池田軍會經過長久手山谷，當時忍者其實即係如Tom Cruise嘅特工，家康大軍埋伏長久手山谷。結果池田恒興一經過就中伏並戰死，奇襲隊全面潰敗。
豐臣秀吉亦一早估到家康會估到佢用奇襲，所以實際上想以池田恒興做餌引敵方調兵，自己再反反奇襲家康伏埋部隊。當斥候報告小牧山城有異動，秀吉已馬上出兵，但可惜還是遲咗一步。
最後雙方來來往往接戰仍分唔出勝負，戰事拖近一年，秀吉決定用佢拿手嘅外交戰，單方面向織田信雄議和，許諾保持信雄諸侯地位，信雄見有著數又倒向秀吉方。德川軍被孤立後，秀吉再私底下同家康講數：只要你認我做大佬，一切依舊。
1985年美日簽定《廣場協議》，時人亦以為貿易戰落幕，點知原來1985年先係開始。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
