【大茶飯】終極貨源歸邊
董伯伯家族的東方海外(0316)，在去年7月獲中遠海運(1919)出價78.67元收購，當時已知道收購要中歐美三地的監管機構審批，係有排搞的，但都估唔到，原來件事拖拉咗超過12個月，這一年來股價長期都有5%至8%的折讓，可以反映到市場都擔心單刁最終會出事，尤其是中
美貿易戰在3月尾開始發酵，美國的反壟斷部門實在可以幫侵侵打擊阿爺，而東方海外股價在4月中興(0763)事件時，曾一度跌至68.25元，個款直頭會告吹添，結果美國方面只係需要東方海外出售位於美國長灘的貨櫃碼頭予第三方，就開綠燈。
在7月初，收購之事終於寄出通函，並在7月8日，中遠海運公佈，收購將成為無條件，一切好似塵埃落定，但如果戰友係有心搵料，在通函內可能發現有趣之事。由於中遠海運有意維持東方海外的上市地位，所以萬一全購之後，公眾持股低於25%，佢地會以78.67元配股予三間公司，長和(0001)旗下公司持4.99%，另2.38%將由國務院旗下國投持有，餘下的7.73%將由PSD Investco及絲路基金購入。
睇番個股權架購，中遠海運會從董伯伯家族買入58.8%，上港集團將買入9.9%，而中遠海運將對公眾股東提出全購，如果全部股東接納全購，就會按順序配股予長和、國投及絲路基金，換言之其實佢地唔一定拿到貨的。好喇，上周五正是要約收購期的deadline，公司亦於收市後發通告，原來最後有98.43%股份接納(包括董伯伯)，所以配股就要進行了，即係長和接4.99%，國投持2.38%，PSD Investco及絲路基金就會有6.16%，條數係咁計的，因為上港的9.9%屬公眾股東，1.57%股東不接納收購，所以25%的公眾持股，將有13.53%需要批股予以上三位股東。
如果戰友心水清，就會睇到咩叫貨源歸邊了，假設幾位接貨的股東唔沽貨，東方海外的街貨就只有1.57%，即982萬股，有趣的是，78.67元這個全購價，在星期四輕微踢穿，在星期五大部分時間都在樓下，直至收市前5分鐘才衝至78.80元，在競價時段前，全日成交只有58000股，但在收市競價後，收市價為82.55元，較收市前高4.7%，而成交亦多了59000股。買入的投資者真係相當有信心，但唔好忘記，剛才青冰計的街貨，要待收市後那份通告發出，才計得到。但戰友都唔需要考慮衝唔衝入，因為將會停牌至批股為止，究竟貨源歸邊係唔係一定炒上，復牌後再睇吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
