笑到最後：死亡變黃金的契機
■
港股將會有一個黃金交叉的契機，背後原因只有三個字：定價權。 資料圖片
股榮兄喺佢專欄「趣BlogBlog」指出，「恒生指數7月最後兩個交易日，會出現終極死亡交叉（50天線跌穿250天線）」，並指出真正死亡機會只係一半半，亦有機會係黃金交叉。高明傾向相信，港股將會有一個黃金交叉的契機，背後原因只有三個字：定價權。
舊年港股強絕全球，立即引嚟中國財經傳媒及評論叫囂，指出我國已取回港股的「定價權」。傳統上，課本會教價格係市場而定，當然，這是錯的，只有中式邏輯嘅定價權先係永恒真理：港股入面有好多中資股，長期被外資沽空，外國勢力不想中國強大，所以令中國估值偏低，只要北水湧港，狂買港股，炒高估值，便可取回港股定價權。
今年2月初美股小股災，港股成交回落至700億元左右，明顯外資已被中資定價權震懾，交返個場出嚟，任由我國定價。不過，我國傳媒對定價權嘅論述同步減少，恒指亦已回到去年11月「勝利宣言」時水平。
50天線跌穿250天線看似係死亡交叉，但只要我國北水不只有嘴炮，而係真金白銀南下來港掃高港股，告訴全球資金，外國人給予港股嘅估值係錯，中國人買落去嘅估值先係啱，現時恒指市盈率僅12倍，相對標普24倍，明顯被嚴重睇低，中資北水應立即來港掃港股，炒上合理水平。
至於一般散戶點睇北水真係有心爭奪定價權，再炒高港股？根據該篇勝利宣言，「一旦某地區某外族移民佔比超過了10%，將直接改變該地區的生態與話語權分配」，只要港股通資金流入佔一成，即淨流入約70億元，便等同北水再度湧港，然後連續10日大額流入，相信我國穩奪定價權。到時值得追入，因為牛市已重新撻著。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
