主席暴卒 股價暴升
2018年08月21日
中美再展開貿易談判，中港股市出現遲來的升市。雖然內地對談判不敢吹得太大，但有得傾始終好過無得傾，喺大市超賣下，恒生指數高開，彈高384點收市。
中美談判仲等緊消息，市場話題轉咗去經營759阿信屋的CEC國際(759) 主
席林偉駿逝世。CEC本來係做廠，由於經營條件轉差，林偉駿改為做零售。雖然呢檔生意唔係咁大，但係佢善於吸引傳媒目光，經常上報，加上阿信屋有唔少零售點，令佢嘅知名度遠超生意同財富，佢離世嘅消息都吸引不少人興趣。
惟林偉駿喺私家醫院病逝，相信係有病。佢之前接受訪問，都講自己試過中風又有糖尿，身體好差。不過，以佢只係花甲之年，現代標準嚟講仲好年輕，就咁過咗身除咗個人原因，好多人都估同佢做生意壓力大有關。林偉駿高調轉型做零售，開始時雖然成日見報好過癮，但呢行競爭超級激烈，好多時做埋做埋唔夠交租，絕對係勞心勞力，佢做生意靠打折扣鬥平，呢啲手法其實好難維持，加上咁高調反而吸引咗其他人入行，結果壓力仲大。
炒759賣盤要留神
有中環茶友話，若然佢開頭轉型唔做零售，集中資金去投資物業，雖然只係做個小投資者或大炒家，但肯定易賺錢好多，使乜搞到日夜操勞？好似另一間做凍肉生意的佳寶，策略係自置物業，以戰養舖，唔好鬥平，就算本業難做，靠物業都賺番個突。
林偉駿離世，公司通告話將盡力按已故主席定立的策略繼續經營集團業務，並將重組架構。九年前曾擔任副主席兼董事總經理的鄧鳳群，獲委任為主席兼董事總經理及提名委員會主席。喺消息公佈後，759昨日股價竟然急升，茶友話主席暴卒，股價暴升，睇見都有啲悲涼，令人同情。林偉駿喺零售業打造出一個新品牌，都算係一代人物，不能單以一時成績論英雄。
「759阿信屋」曾經風靡一時，高峰期分店達271間，目前分店約209間。759股價暴漲，可能係因為有報道指，同行優品360°或有意收購阿信屋。優品老闆林子峰澄清，報道中提述的10億元，是個人對759阿信屋業務及資產價值的主觀評價，不代表有任何具體收購意向。他認為不同公司的營商手法、風險取態不盡相同，不意味不同業務經營方式及取向有優劣之分，若因表達不當引起誤解深感抱歉。受消息刺激，759一度飆124%，高見1.04元；收報0.89元，成交1.45億元。
759股價暴漲後，市值先得六億元。喺主席未過身前，佢市值只有三億元，主要係市場覺得林偉駿未必捨得放棄盤生意，呢瓣業務風險咁大，所以市值連5、6億的殼價都未到，O依家就趁壞消息博賣盤。以現時市值計股價唔可以話好高，而且佢流通量唔多，炒起上嚟可以大上大落，但要留意嘅係，現時內地水緊，港交所又收緊賣殼，所以投機賣盤就要計埋呢啲因素，就算跟風炒作都要做定跳車準備。
傳國家隊入市護價
759呢啲公司夠話題性，但對大市影響就好微。昨日市場主要係跟隨A股造好，繼續反彈。外電報道，「國家隊」昨日入市，大手買入藍籌股，以支持市場。雖然國家相關資金入市，只是為了維護市場穩定，並非為了推高股價，A股仍反覆上揚。上證指數收報2698點，升29點，深成指數收報8414點，揚57點。
恒指則收報27598點，升384點；國指收報10632點，漲118點，成交937億元，升市動力暫時唔算特別強。指數反彈主要靠重磅股帶動，騰訊(700) 勁升逾4%，收報350.8元；被視為資金停泊處的中國移動(941) 有大量資金掃入，升2%，收報74.8元，見逾三個半月高位。
人民幣回升，三大內地航空股股價上揚，東航(670) 升6.6%，收報4.71元；南航(1055) 飆5.4%，收報5.09元；國航(753) 為升幅最大國指成份股，收漲4.2%，報6.7元。手機設備股舜宇光學(2382) 繼續跌1.7%，收報87.05元。
陸羽仁
金融High Tea 舊文
來源 source: http://hdfin.stheadline.com
