大棋局：銀紙改變朝代的故事
■在五六百年前，歐洲從美洲搶嚟大量白銀，到中國買貨順便用白銀換成黃金走，明朝中葉因此出現巨額貿易順差。資料圖片
銀紙自己有腳，當錢大規模改變流動方向，往往會改變一朝一國之命運，甚至人類文明發展的進程，學習金融越久相信越有這種感悟。土耳其
嘅前身鄂圖曼帝國，1453年攻陷君士坦丁堡，嚇窒歐洲國家。一時之間，全歐洲掀起爭做水貨佬風潮。因為鄂圖曼帝國盤踞歐亞樞紐，往來貿易都要經佢。結果鄂圖曼帝國的出現，揭開了歐洲的大航海時代（Age of Discovery）。順帶一提，土耳其即係突厥。
歐洲貿易商想賺大錢，就要諗計繞過鄂圖曼帝國壟斷。水貨佬要賺最多嘅錢就要比其他水貨佬快，我啲胡椒今日送到葡萄牙，你嗰啲下個禮拜先到，梗係比你賣得好價。於是，所有有錢佬乃至各國皇室，紛紛扲荷包資助科學家，要佢哋研究天文地理、物理力學，令隻船用最少時間運最多嘅貨。
中國絲綢、瓷器係搶手貨，但歐洲人嚟中國貿易重有一個目的，就係要黃金。當時歐洲金貴銀賤，中國相反。歐洲金銀比約為1：12－15，中國則1：5－8。出現carry trade空間，加上時值歐洲從美洲搶嚟大量白銀，到中國買貨順便用白銀換成黃金走，明朝中葉因此出現巨額貿易順差。大量白銀流入，解決了明朝早期因亂印銀紙遺留的問題。
明朝亂印鈔 舉國囤白銀
但凡事都有盡頭，carry trade做得越多，價差就會越縮越細直至冇得做。當價差消失，carry trade唔做，明朝貿易順差一下子大減，白銀流入大減。但明朝嘅資產價格已被炒起，突然發覺冇銀用，國家陷入通縮。想印銀紙，早期因亂印銀紙平民已經唔信政府，白銀被囤積得更嚴重。舉國冇銀用，外憂內患陸續嚟料，明朝開徵三餉，即周圍加稅，百姓更加媽媽聲，結果大家都知道。
歐洲大航海時代對中國還有一個重要影響，就係傳入美洲薯仔。薯仔易種，產量大，無論歐洲定中國都因為薯仔傳入解決了糧食問題，人口急遽上升。清朝初期人口約4,000萬人，乾隆時突破2億人，晚清近4億人。人口紅利令朝廷感覺清朝好強大，因為只要每人抽1蚊稅閒閒地都有2億，旁邊啲呂宋國邊有咁易拎2億出嚟。
近4億人口，80萬朝廷衛軍，天人之量，大國之姿，邊個估到鴉片戰爭會輸畀只有萬幾人的英軍？到北洋艦隊成立，規模世界第八，亞洲第一，朝廷再次受到量的感動。結果甲午戰爭開波，一炮冚包散。唯獨落手做嘅李鴻章晚年感嘆「辦了一輩子的事……都是紙糊的老虎……但裱糊匠又何術能負其責？」
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
