【財演算法】技術分析 — 線的陷阱（蔡嘉民）
2018-9-11 9:44:57
回顧一下上一篇專欄講到人眼其實好有趣，好多時會碰到盲點。其實平時都有好多視覺偏差嘅遊戲玩，就算玩過再玩都係會中伏，墮入盲點，更加複雜嘅係我地平時炒野啲技術分析圖，好容易會令到啲人嘅眼睛去忽視一啲失
敗嘅趨勢線，相反去搵一啲短期底去連成一條新嘅、成功嘅趨勢線去說服自己。
其實喺技術分析入面，單一條線並非一個好嘅指標。舉個例，坊間最常用到嘅支持或者阻力位，例如30000點係阻力。當個市升穿30000點嘅時候，多數炒家就會爭相買入；而如果個市落返30000點以下，就會係突破失敗，搶住賣出。當中問題在於，假設你反應極快，你會喺30010點買入，喺29990點沽出。有經驗嘅炒家都知道，個市一定唔會咁乾淨利落咁樣，一穿30000點就一支箭咁衝上雲霄，而係會上落穿插，磨翻一陣先會行一個清晰方向出黎。如是者，當你不斷30010點買入，29990點沽出的話，來回5次已經無左100點。如果太過迷戀一條線，最終會輸俾手續費同買賣差價。
有好多時，為左解決呢個問題，啲人會提倡等個突破幅度大啲先出手，例如30050點買入，29950點沽出。其實於事無補，只係減少「左一巴右一巴」嘅次數，但係增加左虧損幅度，個結果都係類近，因為嘗試增加命中率同時其實犧牲嘅係利潤幅度，得不償失。
人眼睇圖並唔會留意倒呢一類問題，因為人會習慣將睇倒嘅野合理化，即使股價真係穿左少少個支持位，但見佢之後彈返上去，都會當佢係成功喺支持位反彈嘅例子。但真實交易嗰陣，你一見倒穿左就已經放左隻股票了。
咁究竟有咩解決方法呢？有咩方法可以減少線類系統嘅技術陷阱呢？下回續。
財演算法 - 蔡嘉民 舊文
來源 source: http://www.winmoney.hk
