【魚樂無窮】春泉敵意收購 有冇商機？（唐牛）
春泉（1426）周三發通告，持股14.82%的股東之一太盟，提出自願有條件全面要約，每股要約價4.85元，較周一收市價3元溢價61.7%，無怪乎消息公佈後，一度炒高43%至4.3元，但以昨日收市價4.01元計，與要約價仍有約兩成的差距。
「
咁著數嘅嘢都有？快啲衝入場先！」當然冇咁大隻蛤乸隨街跳，今次要約屬有條件，太盟在要約截止時要奪得逾50%基金單位，才會以4.85元收購股份。望望春泉股權架構，大股東RCA Fund持股27.45%，另一隻China Orient Stable Value Fund則持9.13%，通告未提及他們會接納要約，意味太盟需要向持股48.6%的公眾股東埋手。
太盟管理層接受傳媒查詢時強調，今次不是敵意收購，不過從種種跡象顯示，交易火藥味甚濃。太盟講明要約成功後，將會罷免管理人以及委任新管理人，以對春泉進行戰略檢討，從而保護及保持其投資價值的決心；事實上，太盟去年8月已曾提出罷免管理人，但最終遭80%投票股東反對，未能成事。
上次輸得咁大鑊，今次捲土重來，唯有講金唔講心，用較歷史高位更高的價錢誘惑股東，以今年咁弱雞的市況，實在有一定吸引力，所以就算收貨艱難，也未必打定輸數。從投資角度出發，搞得掂就見4.85元，搞唔掂就插番落3元，有興趣的戰友，自行計算值博率入場吧。
唐牛fb專頁：http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
