加息期買股要有護城河
2018年09月28日
美國加息0.25厘，香港利率終於調升，幅度細美國一半，即係0.125厘，幅度相當輕微，差不多等同搔癢，不過搔癢通常搔咗第一次，就會繼續搔，加息都一樣。香港過去無跟加，現在步伐終於追貼，未來美國若要加息，香港都會。
美國聯儲
局發表聲明，語調俾人感覺略為偏鷹，市場估計年底前，美國有相當機會再加一次息，然後明年加三次，2020年加多一次，利息可能就見頂。按照呢個步伐，香港跟足的話，息口合共調升1.375厘，仍然低過實際通脹率，即係仲未擺脫實質負利率。由於呢個原因，兼且香港跟加係意料之內，所以港股對利率12年來首度調升，反應唔算好大，恒指初段仲有上升，跟住開始回落，但沽售壓力唔算好強。
昆能突破創一年高位
收市後，富時羅素將A股納入旗下全球指數系列，最終目標係全面納入A股，未來中國股票有望喺富時新興市場指數中，佔50%以上權重，喺富時環球指數中佔6.5%權重。富時羅素行政總裁麥思平(Mark Makepeace)形容，中國市場未來有望在全球投資組合中佔10%以上，是對全球投資界的巨大改變。
雖然未來息口見唔到大升條件，中環茶友講起投資策略應該點？陸羽仁覺得，從投機的我當然可以高沽低揸短炒，但如果係投資的我，在加息周期買股，始終有點逆水行舟感覺，最好小心一啲，要增加防守性，揀股可以揀啲有護城河保護的堡壘型股份。堡壘型股份就係有資產同穩定業務，可以防止風雨，如果有派息，就等如有護城河守護。
最近油股表現標青，仲留意到做天然氣的昆侖能源(135) 近月股價突破，創咗52周新高，明顯跑贏大市。呢隻股份過去陸羽仁有分析過，覺得佢底子算穩，但佢股價主要都喺7、8元間徘徊，若然入市水位唔靚，就有可能會買貴咗。不過，佢喺上月底公佈中期業績，純利增長咗21%，股價就開始突破，昨日逆市升上9.24元，大升近4%。睇番佢最近幾年，盈利最叻係2013年賺57億元，最差係2016年跌到得返6.6億元。去年佢賺47億元，睇勢頭今年盈利有機會衝擊近年高位，所以股份出現突破。
昆能係中石油最早上市的子公司，後來阿媽上市，佢轉型集中做天然氣。轉型後呢幾年股價一般，但佢一直有息派，就算最差的2016年就算減派，都堅持益吓股東，呢個做法對維持小股東士氣有一定幫助。目前昆能市盈率13倍，息率有2.8厘，O依家買有啲貴，但如果手頭有貨，唔使咁快清貨食胡，可以博佢再有得去吓。由呢個經驗睇，如果係當年佢估值唔高水平買的堡壘股當投資，退守至少有息收，即使後來下跌，就會較易捱過逆境，最後返家鄉。
觀望氣氛濃交投大縮
美股收跌，但恒指高開95點至27912點，滙控(005) 旗下滙豐銀行及恒生銀行(011) 同時宣佈上調最優惠利率(P)後大市倒跌，恒指收報27715點，下滑101點；國企指數收報10938點，跌46點，成交只有777億元，睇嚟市場觀望氣氛好濃厚，睇睇美股晚上表現，所以暫時唔可以咁快論斷話加息影響已完全消散。個別藍籌單日都由升轉跌，近日表現較強的平保(2318) 跌0.38%，收報78.85元；半新股美團點評(3690) 下滑2.6%，收報67元；濠賭股弱勢，銀娛(027) 急跌4.5%。
陸羽仁
金融High Tea 舊文
來源 source: http://hdfin.stheadline.com
