Can Bank：股市另類指標（下） - 散子
港股的「丁蟹效應」及「沈大師明燈效應」，每逢跌市都觸動散戶神經。
上個星期寫另類測市系列上集，有朋友留言，覺得散子好似呃咗佢哋個Hit Rate，唔好意思，上一篇散子的確只係顧字數唔好爆太多，無解釋清楚呢個「另類」係有派膠成份，
所以專登今次寫下集嘅時候，第一段就講清楚。
今次講香港版，不得不提「丁蟹效應」，傳說中，每次秋官有新劇，個市就會冧，往績準繩率超過50%，連大行里昂（今日中信里昂）亦曾經出過報告，秋官亦都出嚟回應過。
「沈大師明燈效應」，事緣於大時代之後，大師持續睇好，但個市就持續向下，呢啲一連串嘅「手風唔順」，造就咗大師有呢個效應。缺點係，大師近期睇騰訊（700）非常準確，要同大師對賭唔係咁易。
《蘋果》A1，每一次《蘋果》用股市做A1，如果係股市大跌嘅，第二日就會有反彈，反之亦然。
最後一個，亦係散子個人認為最準嘅指標，就係GYM房師奶講股，股市走勢平穩向上，基本上唔會聽到，直到聽到佢哋「偉論」嘅時候，就一定要走，對上一次散子聽到師奶GYM房講股，就係今個月頭。
最後都要補返句，以上嘅效應或非傳統指標，並無科學根據，投資者請勿基於上述因素作出任何投資決定。
散子
http://fb.com/ 散子-257101397966975
Can Bank - 散子 舊文
來源 source: http://hk.finance.appledaily.com
