中國開始反攻
2018年09月19日
美國一方面邀請中國重開貿易談判，一面宣佈向2000億美元中國貨徵收關稅，出埋刀叫人談判，中國只能強硬回應，提出反制徵稅措施。雖然中方唔可以同樣反制裁2000億美國貨，但唔會任人魚肉，隨時針對美國關鍵產品零件供應鏈出招。喺貿易關係硬碰硬
嘅同時，阿爺出手護市，力撐內地A股，港股喺急插逾200點後掉頭向上，人仔匯價力保不失，收市仲要反升46點。 中美繼續過招，港股聞聲繼續跌，但內地A股卻無因此大插，反而仲喺壞消息下回升，一開始稍插就抽高唔跌，到下午更發力向上，上證指數收報2699點，大彈48點，升幅1.8%。
護盤軍趁跌入肉頂高A股
要留意嘅係，A股抽升，是在中國表示美國向華施壓做法不能奏效後開始，明顯係內地有護盤大軍配合消息出動。護盤大軍行動之餘，中證監副主席方星海喺天津達沃斯論壇上放話，強調目前中國股市狀況不同於2015年，聲稱自己非常放心，沒有看到股市中散戶被迫斬倉風險，又強調中國宏觀經濟基礎寬厚、運行平穩，資本市場有充份條件健康發展，對長期投資中國市場將獲取良好回報充滿信心。
過去幾個月美國開打貿易戰，內地股市反覆尋底，阿爺除咗零星動作，無大規模托市，O依家睇嚟係覺得美國未出制裁大招、內地股市未跌得夠時，護市作用唔係咁大，不如留番彈藥，等對方真正投下大炸彈時先至行動，O依家對手2000億美元制裁打到嚟，就進行反攻，可以估計中央應對貿易戰帶來的金融震盪，唔會只得護盤一招，而會係組合拳式因應形勢打出，大力放水和救市政策亦少不免，務求減低一波波的衝擊。由於有阿爺撐住，雖然美國重手轟炸，估計A股未來都唔會跌得太深啦。
美國議息新興市場預打風
阿爺撐A股，主力買入內銀等權重股，港股跟住先跌後升，恒指收報27084點，上揚151點；國企指數收報10556點，漲94點，成交金額864億元。內銀股跟隨造好，建行(939) 漲0.5%，收報6.54元；工行(1398) 漲0.7%，收報5.46元；盈富基金(2800) 升0.5%。報道指，內地多個地區水泥價格大幅上調，華潤水泥(1313) 飆7.3%，收報9.24元；金隅(2009) 收漲6%，報2.64元；海螺水泥(914) 五連升，收漲5%，報45.3元；中國建材(3323) 急揚4.5%，收報6.72元。
貿易戰有阿爺頂住，另一個要留意係下個星期美國議息，喺加息之餘點講未來息口走向。新興市場之前紛為打風做準備，土耳其銀行業人士引述央行發出的聲明內容，由本周五起里拉準備金利率，由7%上調至13%。此舉相信係為咗鼓勵銀行持有里拉作為法定準備金。
另外，印尼央行表示，將會出手干預匯市，以捍衛貨幣匯率。市場預期印尼央行將會更積極加息，印尼今年五月以來四度加息，印尼盾近期已貶值至1998年亞洲金融危機最低水平。世界風起雲湧，港股食粥食飯，要睇阿爺可唔可以撐番起內地個市。
IP Group同科技園合作搞創科
全球科技熱方興未艾，香港科技圈亦迎流而上。前滙豐控股大班范智廉加入一間叫IP Group的英國上市公司，而IP Group亦剛到香港設立大中華區總部。IP Group昨日與香港科技園公司，在港交所舉行全球深科技論壇，陸羽仁都去睇過。
IP Group其中一個角色是作為企業孵化器，投資大學科研成果，將其轉化成商業項目，推出市場，並協助集資。IP Group已經培育150間企業，不少甚至已經上市。中國內地市場有龐大商機，吸引IP Group來港設立大中華區總部，對香港投資市場甚有好處。
IP Group今次介紹旗下20多間公司到港，其中包括多間藥物開發、精準醫療、基因組學/微生物組學、癌症免疫療法等。香港已容許同股不同權，以及未有盈利生科公司上市，吸引IP Group屬下的醫療科技公司，來港尋求發展機會，包括牛津大學的Oxford Nanopore Technologies。該公司主要業務是研發簡易DNA測試程序，亦會考慮到香港上市。
另一間IP Group投資的公司Ceres Power，和香港上市公司濰柴動力(2338) 有生意往來。Ceres Power主要業務研發燃料電池，是一種環保電池，該公司與濰柴動力已組成合資企業，濰柴買他們的技術，研發潔淨能源。
香港股民一直希望投資有質素的科技公司，而不是一些搞概念上市造殼的假科技股，創業板有很多這類公司，買入這些假嘢中招機會是百分之百。老老實實，買入有真科技的公司，起碼真係有得博。雖然創科公司仍有經營風險，但10間中只要有一間成功，可能是幾十倍的高回報。
科技園行政總裁黃克強以前在通用電氣就是做併購，睇公司有獨到眼光。今次是科技園有機會引入IP Group旗下更多高質素高科技公司，進駐科學園。加上科技園設有「科技企業投資基金」(CVF)，財政預算案中預留100億元資金予科技園，其中5億元亦會用作加碼CVF，未來科技園將更有能力和外部投資者以配對方式投資，支持夥伴企業，令他們有望成為一支上市科技公司的生力軍。
陸羽仁
金融High Tea 舊文
來源 source: http://hdfin.stheadline.com
