有線炒憧憬要看後着
2018年09月04日
股市千奇百怪，乜都會發生。好似有啲股份明明生意難做，但係耐唔耐就有消息，吸引股民炒作一番，好似做零售的CEC(759) 和香港電視(1137) 都係咁，而有線寬頻(1097) 就成為新晉消息股。有線寬頻宣佈就提供網絡資源，同
中移動香港簽署備忘錄，股價即刻炒作一番，收市報0.18元，勁升1.02倍。
有線寬頻宣佈與中國移動香港訂立諒解備忘錄，內容包括由中國移動香港向集團支付若干費用，以使用集團網絡資源，合作亦包括為中移動香港網絡建設及維護提供專業意見；以及向中國移動香港提供電視內容的代價；及探索透過中國移動香港新建網絡及集團網絡未來商機。根據雙方所講，O依家仲有好多合作細節未傾，包括中間涉及的交易金額，不過有線股價就借消息先行大炒一番。
老虎仔聲稱網絡好值錢
單睇呢個消息，中移動向有線租用網絡，有線同時出售內容畀中移動，呢單生意似乎未必執到好多銀。有線O依家搵銀嘅係寬頻生意，能夠出租網絡的公司，理論上唔止一間。中移動對內容要求又唔太高，有線收唔到太多錢。由於O依家雙方只係有諒解備忘錄，約束力有限，具體仲要睇細節點安排。有線寬頻股價翻咗一番，由5億幾跳到去11億元，升咗5億，若然以10倍市盈率估值，即係呢單生意應該要帶來5000萬以上盈利，究竟又有無咁筍呢？
未有呢個消息前，有線股價位列仙班，只有9.7仙，市值去到不足6億元，嚴格來說仲低過殼價(雖然呢排殼價好似跌咗)。出現咁低殘的股價，主要係公司業績低處未算低。上個月公司公佈上半年業績，虧損擴大至2.54億元，每股虧損4.1仙，去年同期則蝕1.41億元。期內集團收入有5.87億元，按年下跌8.37%。虧損數字持續擴大，收入再錄跌幅，狀況都幾得人驚。
有線寬頻年前賣盤，原本創辦的股東九龍倉(004) 貼大牀嫁女，將原本欠債先換股、後賣盤。控制權易手後，有線虧損擴大，但有線寬頻主席邱達昌似乎信心未失，佢話有線寬頻擁有龐大寬頻網絡，過去投資咗77億元在地下鋪建網絡，現時政府未必再容許大規模鋪建，認為「5G嚟到我哋會好值錢」。唔知係咪邱達昌的樂觀言論增加咗市場信心，所以股價下午繼續有追捧。
人稱「老虎仔」的邱達昌數口一向精，佢對有線咁樂觀，但有業內人士就保守少少。有線現時雖然鋪有網絡，但傳輸能力一般，所以將來就算有5G，個網可能仍然要花錢投資，網絡價值有幾多，有咁多電訊分析員專門研究，相信股價早就有反映。至於傳媒業務O依家蝕得好勁，未見有何新招做電視。
不過業內人士話，有線出呢招係同人內容共享，過去管理層太保守唔會做，電視內容始終有價，和中移動合作不似大生意，問題係有無後着，會唔會做到大生意。無論如何，有線股價升得太急，跟風炒作有要明白呢啲係風險投資。
內地8月PMI遜預期
有線做咗逆市奇葩，大市氣氛則麻麻。美國向2000億美元中國貨品徵稅之諮詢期周四結束，美國總統特朗普早前指計劃會如期落實，恒指低開79點至27809點，之後內地公佈8月財新PMI數據，表現遜於預期，創14個月新低，A股雖然走軟，但先跌後彈，上證指數只是微跌0.2%收場，叫做有少少支持。
恒指最低見27577點，跌311點，之後跟隨內地股市反彈，收報27712點，跌176點；國指收報10813點，跌62點，成交縮減至789億元。內地官媒再狙擊網絡遊戲，網絡遊戲龍頭騰訊(700) 受挫，低見328.6元，收市險守330元關，收挫2.12%，報332.8元。
重災區係汽車股，長城汽車(2333) 旗下哈弗SUV宣佈劈價促銷，收插6.6%，報4.51元；華晨(1114) 瀉7%，收報11.56元；廣汽(2238) 瀉6%，收報8元；北京汽車(1958) 急插5.5%，報收6.24元；東風(489) 收挫4.6%，報8.37元；吉利(175) 急降4.4%，收報15.94元，為表現最差藍籌股；比亞迪(1211) 降1%，收報46.15元。
陸羽仁
金融High Tea 舊文
來源 source: http://hdfin.stheadline.com
