大棋局：中國經濟走數模式 - Mr. Tregunter
內地民企要向銀行借貸較難，因而衍生各類判上判的籌旗平台，P2P是為一類。資料圖片
內地早年有個熱門笑話，有條友向債仔追數，債仔理直氣狀地反詰：「我憑自己本事借來的錢，為甚麼要還？」記得李純恩也說過同樣笑話，有
些人認為錢借到手就是純利。原來這些笑話都不是笑話，是對現實的諷刺。內地P2P借貸逐個爆煲，當有人責難P2P借貸搞手圈了錢就著草時，點知強中自有強中手，有債仔認定根本是個局，所以用P2P借錢後就唔還等佢爆煲。
民企要向銀行借較難，衍生各類判上判的籌旗平台，P2P是為一類。好多人有錢冇碇使，不如投資各種古古怪怪唔知搞乜但又話回報好高的平台。當經濟好景時，不停有資金入場，借出去嘅錢又有點回報，大家開心。一時之間，白手興家的創業者紛紛冒起。共享乜乜共享物物，幾千種P2P平台，幾萬種理財產品，大家都想用最短時間圈最多嘅錢，做實業係假，將錢拆出去食息差先係真。眾人都知道有潮退的一日，只係眾人都認為自己唔會係最後一個入場。
民間如此，地方政府債務亦作如是觀。過去地方政府的主要收入來源係土地出讓金，即係賣地。炒得太狠，金融風險威脅穩定，壓抑樓市政策出台，地方政府唔夠錢使。地方債反應冷淡，咩事大家心中有數。於是央行同財政部公開互窒，地方債條數究竟邊個啃？
繼續減存款準備金率
近日有消息指地方債風險權重或由20%降至0%，其實即係想夾硬嚟。國債風險權重為0%，地方債如降至0%，即係同國債同級。現時財政部數據，枱面上地方債存量約17萬億人民幣，80%由銀行持有，風險權重若降至0%，17ｘ80%ｘ20%＝2.72，即會釋放約2.7萬億人民幣風險資產。
銀行放數，或持有一項資產，要符合《巴塞爾協定》的資本充足率。風險權重高，即壇嘢風險較高，需要更多資本應對。降低地方債風險權重有兩個效果：其一銀行騰出額度去放數；其二銀行有動機更積極買入地方債。但同時埋下一個隱憂，咁樣搞得，人哋對你嘅信任度自然下降。美國市政債風險權重一樣係20%。
在貿易戰情勢下，中國係唔敢大規模放水，尤其美歐英日四大央行都要陸續收水。貿易順差減少，人民幣發行基礎收縮會造成通縮。所以估計跟住中國會從各項貨幣存量政策著手，當中最大機會係繼續減存款準備金率。但同時要面對大美元時代，或連同加息一齊做。即，減存款準備金率，放量；調升息口，加價。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
