中環在線 - 李華華 2018年10月29日
中環在線：披露易換新裝 用家雞手鴨腳 - 李華華
適中字型 較大字型
潮流興「客戶體驗」，華華等了又等，終於等到「披露易」改設計（圖），成個layout唔同曬，靚咗，內容依舊豐富；港交所方面仲話新設計提供更多新特點，為使用手機及平板電腦的用家帶來全新體驗。
網站內容經重新分類，主要搜尋功能前置於網站嘅首頁上，以供直接使用，設計方便咗，又已經上載咗「披露易」網站指南，教埋大家點用㖭！
不過，用開舊版又真係有感情，最重要，唔係霎時適應到，尤其正值業績高峯期；下次轉新版面，華華就建議可以再貼心啲，揀淡季先轉，用家就唔會好似𠵱家咁雞手鴨腳啦。
網站左上方有個ESS（電子呈交系統）嘅按鈕，平時上市發行人、申請人、保薦人或任何擬代上市發行人或申請人呈交公告或上載文件，都要經ESS處理，正常情況下散戶、投資者唔會用到。華華多手㩒咗下，神奇嘅事情就發生咗！彈出嘅視窗顯示，ESS唔支援Chrome，咁支援啲乜？哦！原來係Microsoft IE 8、9、10同11，原來IE仲有咁多捧場客嘅，又真係估唔到喎。
李華華
mailto:LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
