笑到最後 - 高明 2018年10月29日
笑到最後：股災的選股方法 - 高明
除非世界重返有正常利率嘅年代，否則價值投資都幾難發揮。 資料圖片 適中字型 較大字型
《經濟學人》發表一篇題為「價值投資者的痛苦」嘅文章，講述過去十年，若果身為價值投資者，買入價值股持有至今，跑輸增長股，甚至連主要指數都跑輸。如果有同樣統計在香港，價值股應冇跑輸得咁嚴重，因為指數冇連升十年，亦只有三幾隻增長股跑出，但價值股賺唔到錢係事實。
價值投資之父格拉咸，幾時發明價值投資？點解發明價值投資？兩條問題，已經決定咗價值投資嘅用法。
發明價值投資之前，格拉咸經歷美股股災及大蕭條，其合夥基金差啲清盤，要靠外父出手打救。之後他便想出不論任何經濟狀態都不會沒頂、有穩定資本增長嘅投資方法，買入價值低過價格嘅股票，亦係價值投資。以前計算公司價值隨時要穿州過省先搵到份財務報表，今日上網開報價機已大概得知公司資產淨值，今日實踐上，必定係當市場出現被動斬倉時，價值投資先會產生功用，被動斬倉其中一例，就係股災。
價值投資發明近百年，以上嘅說明資料，今日已經等同公開資訊，價值投資等於英文嘅文法，識咗唔代表好叻，唔識就好易打亂章，例如會喺南非大股東沽貨時跟趨勢買入騰訊（700）一樣。冇話邊種方法特別啱，承受到結果就冇問題。
不過，高明亦都同意，價值投資嘅空間只會越來越小，一來，當年大致只有股票同債券兩種投資工具，今日寫條code做虛擬貨幣已可吸資過億，悶股吸引力大減；二來量化寬鬆已經證明，濫發鈔票冇乜後果，超低息環境，投資者寧願燒錢買未來，悶股當然無用武之地。
除非世界重返有正常利率嘅年代，否則價值投資都幾難發揮。最大可能係，只有股災最低迷時段到央行決定救市嘅短暫時刻，價值投資先可發揮最大功效，到央行濫發鈔票後，市場又會買返燒錢買未來嘅股票。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com
