金手指 - 孫柏文 2018年10月2日
金手指：美國中期選舉黑天鵝 - 孫柏文
美國最高法院大法官人選被指性侵女大學教授一事舉國注視，隨時令中期選舉出現黑天鵝式變數。 資料圖片
美國最高法院大法官人選被指性侵女大學教授的參議院司法委員會聽證會，上周展開，花旗國上下都𥄫到實，連紐約股市成交量，都喺聽證會有主角發言時，出現明顯下跌。
反對黨人，想將今次變成一次對花旗國權貴階級白種男性，幾百年奸淫擄掠習性嘅審判。問係咪只要係有錢、有家底嘅白皮鬼佬，就可以肆無忌憚，想點就點，捉個女仔入房狂摷，都冇後果。
侵侵嘅執政黨人，就話今次係老屈。為政治目的，不但令法官身敗名裂，仲要完全摧毀最根本嘅法治原則。如果真係堅料，都唔會喺呢步先爆，而係受害人喺六月出聲時，已公諸於世。𠵱家先出手，擺到明連受害者都玩埋。點都好，周末首輪民調出爐，四成話信女教授，三成信法官，其餘話唔知信邊個。孫柏文睇曬兩邊發言，我完全唔知應該信邊個。
不過可以好肯定，原先唔出聲，甚至來緊11月初唔會去投票嘅侵侵支持者，會因法官嘅說話，再次出動。甚至中間未決定嘅人，都會覺得反對黨timing實在有太大政治動機，唔信個女教授，覺得法官被老屈，而想懲戒反對黨冇底線嘅不擇手段，投執政黨。
之前民調話反對黨好大機會會贏眾議院，贏咗，侵侵會被彈劾。今次可能會出現黑天鵝式變數。
對香港股民最大嘅影響，就係我國偉大中央，已一注獨贏買花旗國反對黨喺11月初選舉贏。完全唔諗住同侵侵妥協，同佢嘅政權鬥長命。原先諗住捱到11月就完嘅貿戰，唔通仲要有排打？大家要有心理準備。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
