大棋局：中國經濟醞釀大變局 - Mr. Tregunter
中國正醞釀取消預售房制度及公有化問題，此二事一旦成真，中國經濟將會翻天覆地。
資料圖片
有兩壇嘢醞釀中國經濟大變，倘若落實，其程度可以用翻天覆地來形容。其一為取消預售房制度，其二為公有化問題。先講預售房，
即香港俗稱嘅樓花。早前廣東省傳出取消預售房，由於太震撼，住建部澄清話唔係取消，而係徵集意見。問題在如果冇咁嘅諗頭，何解要徵集意見？
若取消賣樓花，首當其衝自然係內房企業，事關現時內房起樓的做法，約莫四成資金來自賣樓花。如果只影響內房，那還是小事。2017年中國全國賣地收入5.2萬億人民幣，已佔地方政府公共預算56%。停賣樓花，內房起樓賣樓周轉速度大跌，地方政府收入亦會跟住大跌。在地方債條數唔知邊個啃嘅時候，收入再大跌點搞？另一條水路估計即房產稅。
上述做法最大問題，其實在暗托樓價。一旦冇樓花賣，內地樓市會出現斷層，貨尾一賣完會突然出現真空期，也就係榨乾貨源再托價。價唔跌，令你感覺良好，再用房產稅吸水，咁就高。香港人近年應該好易明白，額外印花稅等措施亦同此理，二手樓盤被鎖周轉速度大跌，有利一手樓吊高嚟賣。點解中國想此刻托樓價，因為滙價同樓價就好似林志玲同侯佩岑，兩個只能揀一個，原理可見舊文《中國審判日》。中國要托樓價，其實就係一個訊號，人民幣滙價唔頂得幾耐。
產權公有制可圈可點
至於公有化問題，最近內地財經媒體被整頓，討論公有制的文章卻唔剷任你登。公有制即資產名義上歸於人民，但由共產黨管理。癥結在中國現時面臨一個乜嘢形勢，致使需要重提公有制？人嘅行為往往受近期記憶影響，蘇聯倒台的其一教訓，係國有資產分配到貴族手上私有化後，冇人再聽最高蘇維埃支笛；貿易戰的談判條件，亦勾起中國對新自由主義、華盛頓共識的戒慎。公有化，係一條橋去應對當下局勢。
全國政協經濟委員會副主任楊偉民提出的產權說法最可圈可點。公有制還是私有制，代表你是否真實擁有，然而產權唔係呢個概念。產權只係權利，包括佔有、使用、轉讓三種權利，就好像中港兩地物業，你可以住、出租、賣，但塊地唔屬於你，業主只是向政府承租的二房東，也就是leasehold。
樓市可行，其他嘢如何？尤其企業股權。假如企業股權都可以咁搞，貿易戰話之你點開放都冇問題。外資進入中國原來只係租你盤生意來做，好似1978年的包產到戶。上述二事尚在醞釀，一旦成真，翻天覆地。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
