Hea富生活 - 郭釗 2018年11月29日
Hea富生活：北海道投資故事 - 郭釗
北海道二世古是不少滑雪愛好者喜愛的地方，也吸引了一些人在當地投資物業。資料圖片 適中字型 較大字型
滑雪季節又到，最近聽咗兩個滑雪加投資嘅故事，值得同大家分享一下。有一班滑雪教練投資咗一幢大樓，自己玩兼做埋民宿，11月收樓，12月去到現場，見到成個屋頂已經積咗一大層厚雪，望望其他同類型屋頂，屋頂無雪兼且啲雪識得自己扇落地㗎喎，點解嘅？
問附近嘅日本人，佢哋就話：「香港人，唔該你哋清走積雪，如果唔係間屋會冧。」於是乎佢哋幾個壯男爬上屋頂清咗一日，但清得唔夠1%。於是畀錢當地專業人士處理，一個鐘盛惠一萬𨨥（約687港元），發現雪下面原來積咗大量枯萎落葉，怪唔知啲防積雪油冇發揮作用啦。
另一個故事，有個老闆，當然都係滑雪愛好者啦，但佢係坐私人飛機去嗰隻，佢同幾個朋友買起曬李澤楷投資嘅二世古雪場連apartment附近土地（李生賣緊12,000蚊港紙一呎），實行「攬曬嚟炒」。唔講唔知，成個日本上年地價升得最快嘅市係俱知安町，有31.61%，相比第二位嘅大阪府中央區12.39%，跑贏一大截。二世古就係喺俱知安，除咗香港人，近幾年多咗好多大陸人去玩，旺季消費極高，差不多四、五千蚊一晚溫泉酒店房，有啲兩房apartment甚至叫價七千蚊一晚。據聞日本政府公佈俱知安町將會有新幹線直達，但唔好以為交通方便咗，買乜都會贏，實在買apartment冇乜錢賺，地又唔同。
畀多個資訊大家，本周一北海道政府已經表示，苫小牧將成為該縣賭場度假村嘅首選地，四家國際賭場運營商亦已在該地開設辦事處，釧路市和留壽都應該冇行。
郭釗
http://fb.com/heaology.edu
本欄逢周四刊出
Hea富生活 - 郭釗 舊文
來源 source: http://hk.finance.appledaily.com
